Samagra hnuaia zirna kal dan tur sawiho

Samagra Shiksha State Project Office-a officer-te leh district tina officer-te chuan nimin khan inkhàrkhip laia Samagra Shiksha hnuaia sikula zirna kalpui dan tur an sawiho a; state project director Lalhmachhuana'n a kaihruai.

Meeting-ah hian Covid-19 hripui léng kara Mizoram hmun hrang hranga Samagra Shiksha enkawl sikula zirlaite'n zirtirna an dawn theih dan tur sawiho a ni a; Samagra hnuaia zirna sikulah naupang admission chu online-a kalpui phawt mai ni se, an ti.

Samagra Shiksha hnuaia secondary school leh higher secondary school hawn thar tura thawktu lâk tharte'n online-in an hna zawm phawt mai se an ti a; khaw hrang hrangah zirna kalpui theih dan tur a inan dawn loh avangin, district tinah DPC-te'n sikul awmna khaw milin kaihhruaina siam se, sikul tinte'n a theih chin chinah Whatsapp group siam zel se, an ti bawk.

Sikul thar hawn turah a ṭul anga administrator ruat mai turin DPC-te an ti a; HSS hawn thar turah pawl 11 leh 12 atan online-a admission tih ṭan nghal turin an rel a ni.