Covid-19 vei Dam tawhte chhuahtir dan tur
Covid-19 vei dam tawhte chhuahtir dan turah Health & Family Welfare department chuan ruahmanna a siam thar a, hman ṭan nghal tur a ni.
Covid-19 positive aṭanga ni 20-naah pawh Rapid Antigen Test hmanga swab sample endik nawnnaah an la positive chuan, enkawltu doctor-te'n District Core Team for Covid Treatment an ráwn ang a, anni'n a ṭul angin ZMC Core Team-te an ráwn leh ang a, kalpui zel dan tur an rêl ang. Aizawl district bikah chuan enkawltu doctor-in a ṭul dan azirin ZMC Core Team-te an ráwn thei thung.
INCHHUAHTIR DAN TUR RUAHMANNA
Symptom nei lote
# Natna lang chhuak lote zingah natna hrik hmuh a nih aṭanga ni 10 chhung chu uluk taka enthlak (observe) an ni ang. Enthlak chhunga a tawp lam ni 3 chhunga khawsik an neih loh chuan ni 10-naah RAT hmanga endik tur a ni.
# Ni 10-naa RAT-ah a negative chuan chhuahtir theih a ni a, amaherawhchu, chhuah aṭanga ni 7 chhung chu in lamah uluk taka inkhung hran chhunzawm ngei ngei tur.
# Ni 10-naa RAT-ah a la positive chuan ni 4 dan zelah RAT tih nawn tur a ni a, RAT result a negative hnuah chauh chhuahtir tur a ni. Chhuah aṭanga ni 7 chhung chu in lamah uluk taka inkhung hran chhunzawm ngei tur a ni.
Ina inenkawlte
# Mahni ina awmte chu positive tih hmuh chhuahna swab sample lak ní aṭanga ni 10 chhung chu uluk taka enthlak an ni ang a, ni 10-naah RAT tih tur a ni.
# Ni 10-naa RAT-ah a negative chuan Covid-19 enkawlna tihtawp (discharge) theih a ni a, mahse, enkawlna tihtawp aṭanga ni 7 chhung chu in lamah uluk taka inkhung hran zui leh tur.
# Ni 10-naa RAT result a la positive chuan ni 4 dan zelah RAT tih tur a ni a, RAT result a negative hnuah chauh dama ngaih an ni ang a, discharge/enkawlna tihtawp theih a ni. Enkawlna tihtawp a nih aṭanga ni 7 chhung uluk taka inkhung hran zui tur a ni.
Symptom neite
# Natna lang chhuakte zingah natna a lan chhuah aṭanga ni 10-na aṭanga chhiar leta ni 3 chhung emaw, a aia rei emaw khawsik a neih loh a, oxygen saturation 95% aia sang a nih bawk chuan RAT tih tur.
# Ni 10-naa RAT result a negative chuan chhuahtir theih a ni a, mahse, chhuah aṭanga ni 7 chhung in lamah inkhung hran zui ngei tur a ni.
# Ni 10-naa RAT-ah a la positive chuan ni 4 danah RAT tih nawn zel tur, RAT-ah a negative chuan chhuahtir theih a ni a, mahse, chhuah aṭanga ni 7 chhung inah inkhung hran zui tur.
Na zual leh natna benvawn nei
# Covid-19 vei damlo na zual leh natna benvawn neite chu ni 3 chhung khawsik an neih tawh loh bakah, ni 3 chhung an oxygen saturation 95% aia sang a nih chuan RTPCR hmanga sample endik tur.
# RTPCR result a negative chuan chhuahtir theih a ni a, mahse, chhuah aṭanga ni 7 chhung inah uluk taka inkhung hran chhunzawm ngei ngei tur.
# RTPCR test-ah a la positive chuan, ni 4 hnuah RTPCR test tih nawn tur a ni a, a positive zui zel chuan ni 28 chhung chu ni 4 dan zelah swab test tih zel tur a ni.