Lungleia RT-PCR khawl bun turin Hma la chak turin sorkar ngen

ZPM Southern Headquarters, Lunglei chuan thuchhuah siamin, Lunglei Civil Hospital-a RT-PCR khawl bun tura tih tawh, tun thlenga bun a la ni lo chu pawi an tih thu an tarlang a; chak zawka hma la turin sorkar an ngen.

Lunglei ZPM chuan, "Chhim lam mipuite'n kan chhawr ṭangkai em em tur Lunglei Civil Hostipal-a RT-PCR khawl bun tur a tih, vawiin thlenga hman theih tura peih a la ni lo hi pawi kan ti hle. Chhim lam mipuite hriselna hi politics ball-a hmang tawh lo a, kan mamawhna sànzia hriaa chak zawk a hma la turin Mizoram sorkar kan ngen nawn leh a ni," an ti.

ZPM Southern Hqtr. chuan, Covid-19 thawh hnihna hnuah May 2, 2021 khan Tlabungah hripui vei hmuh chhuah ṭan a ni a, tun dinhmunah Covid-19 vei an tam tâk avangin Tlabunga CCC pahnih Tourist Lodge (Old & New) leh Circuit House-te chu a khah reng avangin mi 52 chu Lunglei lama enkawl turin lak an ni tih an sawi a; home isolation-in mi 33 an awm tih an sawi bawk.

Tlabungah hripui vei an tam tâk avangin doctor leh nurse an indaih lo nasa a, Lunglei aṭangin doctor pakhat a kal tawh bakah, doctor pakhat dang kal leh tura tih nia an hriat thu sawiin Lunglei ZPM chuan, "Heti chung hian doctor leh nurse an mamawhna a la phuhru zo lo hle. CCC pakhatah doctor pakhat awm tura beisei a nih laiin, tunah chuan a la theih rih lo a, thawktute an buai hle," an ti a; bialtu MLA Nihar Kanti Chakma chu a bial tan thapui thawha ṭang tur leh, Mizoram sorkar pawh nasa zawka hma la turin an ngen.

Lunglei ZPM hian Tlabung lama a ṭul a pianga hman turin Rs.11,000 an pe a; Tlabung chhehvela khaw tam takin mamawh an thiarna marboat chu a chhiat avangin ration sem kawngah harsatna an tâwk tih sawiin, Mizoram sorkar chu a rang lama marboat ngaihtuahsak turin an ngen a ni.