Ramri hawn a nih dan chhui turin Lunglei YMA-in BSF an hriattir

Lunglei DC kaihhruaina hnuaia YMA Sub-Hqrs., Lunglei hruaitute leh 131 BSF hotute'n Mizoram leh Bangladesh ramri hungna gate hawn dan tura ruahmanna an siam ang ni loin BSF sipaite'n gate an hawnga an hriat avangin, Lunglei Sub-Hqrs. YMA hruaitute chuan nimin khan BSF hotute hnenah thil awm dan chhui chiang turin an hrilh.

Covid-19 vanga ramri venhim hna BSF-in an thawh danah YMA Sub-Hqrs., Lunglei hruaitute an lungawi loh avangin May 11, 2020 khan Lunglei DC kaihhruaina hnuaiah YMA leh BSF hruaitute chu an ṭhukhawm a ni.

Ṭhutkhawmnaa thutlukna an siam dan chuan, ramri hungna páwna mite chu hung chhungah luh phal a ni lo a, essential commodity an mamawh chuan task force-te'n thuneitute hnenah an thlen ang. Mamawh la tur hian a duh duh kal loin, an task force aiawhte Mizoram chhungah an rawn lut ṭhin tur a ni.

Hetih lai hian, Khawthlangtuipui Group YMA hruaitute chuan, meeting thuchhuak ang ni loin ramri hungna gate hawn ṭhin a nia an hriat thu Lunglei Sub-Hqrs. YMA hruaitute hnenah an thlen.

Vanglaini palai zawhna chhangin Lunglei Sub-Hqrs. YMA president Lalrotluanga chuan, Khawthlangtuipui Group YMA hruaitute thu thlen chu an bawhzui thu a sawi a, "BSF Commandant a awm loh avangin 2nd in Command hnenah gate an hawn dan chhui chiang tur leh kan lungawi loh thu ka thlen a, a lo bawhzui tur thu min hrilh," a ti.