Opposition group leader Lalduhoma'n Mizorama exam centre dah turin ngen

Mizoram Legislative Assembly-a opposition group leader Lalduhoma chuan Council for the Indian School Certificate Examinations (CISCE) hnenah lehkha (email) thawnin, Mizoramah exam centre dah turin a ngen.

Lalduhoma, MLA chuan, novel coronavirus (Covid-19) vangin khawvel pumpuiah nun­­phung a buai tih tarlangin, "He buaina leh harsatna hian zirlaite pawh a nghawng a, a bik takin Senior Secondary School Leaving Exami­nation turte'n harsatna nasa tak an tawk a ni," a ti a; chuvang chuan mi tam tak an state ṭheuh (home state)-ah an haw tih a tarlang.

Mizoram aṭangin state pawna lehkha zir tam tak an awm a, CISCE hnuaia board exam hmabak mek pawh eng emaw zat an awm tih sawiin Lalduhoma chuan, chu'ng zirlaite chu state páwna chhuak thei an nih tawh rih loh avangin Aizawlah exam centre ruahman turin CISCE a ngen a ni.

Hemi chungchangah hian ZPM chuan thuchhuah siamin tun dinhmuna CISCE hnuaia board exam pahnih - ICSE leh ISC exam centre Mizoram aṭanga hnai ber chu Agartala (Tripura) leh Shillong (Meghalaya) a nih thu a tarlang a, "Zirlaite harsatna sukiang tura Pu Lalduhoma'n hma a la hi lawmawm kan ti hle a ni," a ti.

ZPM chuan, an par­ty President rawtna angin Covid-19 donaa a hmatáwnga thawkte'n vanduaina an tawh palha tuam hlâwmna tur ruahmanna Mizoram sorkarin a siam chu lawm­awm an tih thu an sawi.