KHAWTHLIR

Chief minister Zoramthanga chuan a thlabi hlawhpui (basic pay) aṭanga 60% (Rs. 48,000) chu Covid-19 dona atan CM Relief Fund-ah nimin khan a chhûng lût. Sorkar thuchhuah tarlan danin, CM-in hlawh aṭanga sum a pek hi May 4 & 7, 2020-a Assembly Speaker hoa legislature party pathum aiawhte thutlukna anga a pek a ni.

Mizoram Board of School Education chuan, HSSLC 2020 Examination chhunzawm turah, Mizoram páwna awmte tan Vairengte H/S leh KR H/S, Zawlnuamah exam theihna tur a ruahman. Heng centre buatsaih thara exam duh tan phone number 9612163542 (Vairengte) leh 9612586653 (Zawlnuam)-ahte June 5, 2020 ral hmain inhriattir tur a ni.

Covid-19 donaa a hmatáwnga thawkte an thih a, Pradhan Mantri Garib Kalyan Package (PMGKP) ruahmanna hnuaia luman dilna lutte enfel a, a ṭul anga insurance company dàwrtu tur state level authority atan Task Group of Insu­rance ruat a ni tih nimin khan sorkar thuchhuahin a tarlang.

Nimin June 1 kha World Milk Day a ni a, he ni denchhen hian Mizoram Milk Pro­ducers’ Cooperative Union Ltd. (MULCO) chuan nimin khan Ai­zawl Tennis Court bulah bawnghnute aṭanga an siam chhuahte zawrhna Milk Parlour an din thar chu MULCO chairman Vanlalchhunga'n a hawng.

Nimin chawhma dar 10:30 vel khan Lunglei aṭanga Aizawl pana tlân Aizawl city bus MZ-01 E-7261 chu Aibawk leh Sateek inkarah chesual­in, kawng thlangah a tla a; a khalhtu hliamin, Aibawk damdawi-inah lak a ni a, conductor erawh a na lo thung. Thu dawn danin, bus hi phaia Mizo tangkhang rawn hawte Bairabi aṭanga Lungleia dahtute zinga mi a ni a, Aizawl pana a let lehna lamah a chesual ta a ni.