Covid-19 Ordinance bawhchhiate Sum chawi Rs. 15,03,500 a tling
Nimin zing dar 9 thleng khan Mizoram pumah The Mizoram (Containment and Prevention of COVID-19) Ordinance, 2020 bawhchhia mi 6,758 man a ni tawh a, dan bawhchhiate pawisa chawi tling khawm chu Rs. 15,03,500 a ni.
Police thuchhuah tarlan danin, May 31, Pathianni zing dar 9 leh nimin zing dar 9 inkar khan May 4, 2020-a hman ṭan Covid-19 Ordinance bawhchhia mi 62 man an ni a, sum chawi zat belhkhawm chu Rs. 18,800 a ni. Vantlang hmuna hmai tuam lo (Section 4(1) bawhchhia) mi 48 man niin, police man mi 42 leh task force man mi paruk an ni a, sum chawitir zat chu Rs. 4,800 a ni. Dan dang bawhchhia mi 14-te chu Rs. 14,000 chawitir a ni bawk.
Hetih lai hian, Covid-19 Ordinance-a langsar ṭhenkhat - social distancing (Section 4(2)), khawlaia chil chhâk khapna (Section 4(3)), ramri kãn rû hremna (Section 4(5)), quarantine tur bibo rù hremna (Section 4(6)), quarantine aṭanga tlanbo hremna (Section 4(7)) leh quarantine laia mi dang himna tiderthâwng hremna (Section 4(8)) hnuaiah Pathianni aṭanga nimin zing dar 9 thlengin man an awm lo.