Health Minister-in inrenchem chunga tuar hrâm hrâm turin mipui a ngen

Health & Family Welfare minister Dr R Lalthangliana chuan nimin khan Covid-19 léng mek chungchangah thuchah a tichhuak a; total lockdown pawhsei chu dam khawchhuahna tur a ni tih hria a, inrenchem chunga tuar hrâm hrâm turin mipui a ngen.

Dr R Lalthangliana chuan ZMC-ah khum dah belh zel a nih thu sawiin, "Nikum Covid-19 a len tirh khan ZMC-ah hian khum 200 a awm a, mahse Covid-19 veite chu inhlat deuha dah an ngaih vangin khum 150 vel dah a ni. 2nd wave hnuah tihbelh a ni a, khum 246 a awm thei tawh. Tunkar aṭangin khum 35 dang hman theihin peihfel a ni ang a, khum 60 dang hman theih turin buaipui leh nghal a ni. A thawktu lam pawh dahbelh zel an ni. Khum 300 vel a awm hun chuan thawktu leh damlote ei ringawtah thla khatah cheng nuai 30 vel a ngai dawn. CCC-a ei man hi ni khatah cheng nuai 8 chuang a ni mek thung," a ti.