Covid-19 vei mi pathum an thi

Covid-19 hripui vei State Referral Hospital (ZMC)-a enkawl lai mi pahnih chu nimin chawhnu lam khan an thi a, May 22, Inrinni chawhnu khan mi pakhat a thi bawk a; sorkar chhinchhiah danin, Mizoramah hripui vei mi 33 an thi tawh.

Covid-19 vei enkawl lai Tâwkṭiali (63) m/o Thâwnga, Electric Veng, Aizawl chu Inrinni chawhnu dar 2:50 khan a thi a, nimin chawhma dar 11 khan vui a ni. Electric Veng khawtlang hruaitute hnen aṭanga thu dawn danin, a hrisel lohna avanga Aizawla inenkawl tura Tahan, Myanmar aṭanga rawn chhuk a ni.

Tâwkṭiali hi asthma leh lung (heart) ṭha lo nei sa a ni a, hripui a vei tih May 11-ah hmuh chhuah niin, Durtlang BSUP CCC-a enkawl a nih hnuah May 18 khan SRH-ah dah luh a ni tih sorkar thuchhuahin a tarlang.

Zoramnghingi (50) w/o Lalrintluanga Siakeng, Maubawk, Covid-19 vei mek chu nimin chawhnu dar 1:30 khan SRH-ZMC-ah a thi a; nimin tlai dar 5 khan Maubawk MUP Inah vui a ni.

Maubawk LTF aṭanga thu dawn danin, Zoramnghingi hi SLE, kal (kidney) leh thyroid ṭha lo nei a ni a, dialysis ti tura May 7-a damdawi-ina an kalnaah hripui vei a ni tih hmuh chhuah a ni. SRH-ZMC-ah dah nghal a ni a, May 13 aṭangin ICU-ah enkawl a ni tih sorkar thuchhuakin a tarlang.

Nimin vek khan tlai dar 3-ah Thatinkipi (49), Chhinga Veng chu Covid-19 vangin SRH-ZMC-ah a thi a, he thu ziah lai hian, a chhungte duh dan angin a ruang hi Myanmar lama phurh chhoh tura buaipui mek a ni.

Chhinga Veng LTF hruaitute hnen aṭanga thu dawn danin, Thatinkipi hi kal (kidney)-ah harsatna a neih avangin kumin January thlaa Myanmar aṭanga rawn chhuk a ni a; Aizawla private hospital-ah enkawl a nih mek laiin hripui a vei tih hmuh chhuah a ni.

Thatinkipi hi Covid-19 positive a ni tih kumin May 20-ah hmuh chhuah a ni a, hemi ni vêk hian SRH-ZMC ICU-ah enkawl ṭan nghal a nih thu sorkar thuchhuakin a tarlang.