KHAWTHLIR

Thisen pe
YMA, Venghnuai Branch chuan an din champha, platinum jubilee pualin May 22, Inrinni khan Zoram Medical College tan thisen unit 83 an pe a, petute mipa 69 leh hmeichhia 14 an ni.

CCC ei leh in
Health & Family Welfare (HFW) dept. chuan, May 19, 2021 khan notification ti chhuakin Covid Care Centre (CCC)-a awmte'n an ei leh in man an intum a ngaih tawh dawn thu an tarlan hnuah, May 21 khan notification ti chhuak lehin, CCC-a awmte tana ei leh in man intum a ngaih leh dawn loh thu an tarlang a ni. Notification hnuhnung zawk angin CCC-a awmte'n ei leh in a thlawnin an dawng chhunzawm thei dawn.

Containment area
Dawrpui veng chhunga New Market huam china hmun ṭhenkhat, Covid-19 vei tam zualnate chu Aizawl DC-in May 22, Inrinni khan containment area-ah a puang.

Poor Fund-ah pe
T Romana College Staff Welfare Association chuan ZMC - State Referral Hospital Poor Fund-ah May 21, Zirtawpni khan Rs. 20,000 an chhûng lut.

Containment hlîp
Bethlehem Vengthlang hmun ṭhenkhat May 10, 2021-a Covid-19 containment zone-a puan tawh chu hripui inkai darhin ziaawm lam a pana a lan avangin nimin zing dar 4 aṭang khan hlih a nih thu, Aizawl DC-in a puang.

Kolkata-ah hripui vei Mizo thi
C Lalremruata (47) s/o Rev. C Ngurhnema, Zotlang, Aizawl, Covid-19 vei mek chu nimin chawhnu dar 1:30 vel deuh khan RTIICS Hopital, Kolkata-ah a thi. Calcutta Mizo Welfare Association hruaitute hnen aṭanga thu dawn danin, C Lalremruata hi Baptist Church of Mizoram hnuaia missionary a ni a, a nupui Laltluangliani leh an fate nen Kolkata-ah an chhungkuain an awm. A ruang hi Mizoramah lâk tum a ni a, he thu ziah lai hian Kolkata joint resident commissioner Jacob Lalawmpuia, CMWA leh Kolkata Mizo Students' hruaitute'n an buaipui mek a ni.