Health Minister-in ZMC a tlawh SRH-ZMC ward a khat vek tawh

Health & Family Welfare minister Dr R Lalthangliana chuan May 22, Inrinni khan Zoram Medical College (ZMC) a tlawh a, Covid-19 veite enkawlnaa hmalakna leh hmalak zel dan turte a enfiah. Minister chuan, hripui vei an pun zel avangin SRH-ZMC ward zawng zawng a khah vek tawh thu a sawi.

Dr R Lalthangliana chuan, Covid-19 thawh hnihnain a zia a thlak thu sawiin, "Kan rin phak bâk harsatna kan tâwk a, hri kai tharte zingah symptom nei an pun bakah, a tìra symptom nei lo, a hnua nei leh ta, ngaihtuahawm tak tak kan ngah sâwt hle," a ti.

Covid-19 chu Mizoramin chhiatrupna a hmachhawn tawh ṭhin nen a boruak a inan loh thu sawiin R Lalthangliana chuan, "Ngaihtuahna sên thiam pawh a har hle ṭhin a, vawiina ṭha nia kan hriat pawh naktukah a aia ṭha zawk a lo awm leh a, khawvelin inpuahchah ngaihna a hriat loh a nih avang hian a harsa hle a ni," a ti.

Health Minister chuan, kohhran, khawtlang leh mipui ṭan rualnain an thâ a tichak a, a nawr kal ṭhin thu sawiin, "Tih sual palh leh fuh lo palh kan hriat pawhin kan tih dan ang hian thawktu te, rál hmatáwnga awmte rilru tihnual lo záwngin, thuràwn ṭha tak tak min pe turin kan inhawng reng a ni," a ti a; CCC-a enkawl mekte tan ei leh in man chawi ngai lo tura thutlukna siam leh a nih thu a sawi bawk.

Medical Operational Team (MOT) chairman Dr ZR Thiamsanga pawhin thu sawiin, "Damlo kan tam zel a, khum kan indaih tawh si lo a, thawktute an hahin an lu a hai tawh hle a ni," a ti.

Health Minister hian ZMC-a oxygen generating plant siam thar a en a, plant dang pahnih siamna tur hmun laih mek a nih thu an sawi. SRH-a Covid-19 veite enkawlna tur ward pangaa khum awmte a khah vek tawh avangin ward parukna tur sak mek chu peih thuai turin contractor leh ZMC hotute a chah.

Tarlan danin SRH ward tharah khum dah belh a nih chuan nurse 200 chuang mamawh a ni dawn a, Mizoram College of Nursing-a B.Sc final year zirlai 26 chu hman an ni dawn a, vawiinah an zawm ang. National Health Mission hnuaia Health & Wellness officer training zo eng emaw zat an tel dawn a ni.

Mamawh bik thil a awm hun atan Civil Hospital, Aizawl leh hmun danga thawkte pawh chah theih tura hriattir a ni tawh a; mimal damdawi-in neitute pawhin a ṭul a nih chuan an mi leh sate pawh an thawh hreh loh thu an sawi bawk.