Covid vaccine dose 2,98,471 pe tawh

Mizoramah May 21, Zirtawpni thleng khan Covid-19 laka invènna damdawi (vaccine) Covishield dose 2,98,471 pek a ni tawh a, mi 2,46,511 hnenah first dose pek an ni. May 22-23 khan vaccine pek a ni lo.

IDSP tarlan danin, January 16, 2021 aṭanga May 21 thlenga Mizorama Covishield dose 2,98,471 pek tawh zinga 2,46,511 (82.60%) chu first dose a ni a, mi 51,960 (17.40%)-in second dose an la tawh a ni.

May 17 aṭangin kum 18-44 inkar hnenah vaccine pek ṭan a ni a, Health department-in vaccine pek hmasak tura a tihte hnenah pek a ni. Ni nga (May 17-21) chhungin mi 10,727 hnenah first dose pek a ni tawh.

Health department-in district a ṭhen dan chuan, kum 18-44 inkar vaccine pekte chu Aizawl East district-ah tam berin, mi 3,311 an ni a; Aizawl West district-ah mi 2,119, Lunglei district-ah mi 1,290, Siaha district-ah mi 392, Champhai district-ah mi 1,052, Kolasib district-ah mi 804, Lawngtlai district-ah mi 691, Mamit district-ah mi 572 leh Serchhip district-ah mi 496 pek tawh a ni.