MLA leh councillor-te an che chhuak
May 22, Inrinni khan MLA leh councillor-te'n an bial chhung tlawh kualin, Covid-19 avanga harsatna tâwkte chhawmdawlna leh mamawhte an hlân.
Minister of state Lalruatkima chuan a bial Aizawl West-II huam chhunga Vaivakawn, Kanan Veng, Dawrpui Vengthar, Dinthar, Tuikual North leh Tuikual South LTF-te tlawhin, Rs. 50,000 ṭheuh a hlân. Lalruatkima chuan, a bial mipuite chu thlaphang lo tura chahin, "Sorkarin kawng hrang hrangin theihtawp chhuahin hma a la mek a ni," a ti.
Aizawl West-II bialtu MLA hi an bial chhunga councillor pahnih R Thanglura leh Lalfakzuala Chenkual ten an ṭawiawm a ni.
Minister of state K Lalrinliana chuan an chhungkaw suma buhfai an lei ip 133 chu a bial Kolasib huam chhunga VTF 19 hnenah a sem a, VTF tin hnenah ip sarih ṭheuh an pe.
Aizawl West-III bialtu MLA VL Zaithanzama chuan a biala veng hrang hrang - Khatla, Khatla South, Khatla East, Bungkawn, Bungkawn Vengthar, Nursery, Mission Vengthlang, Maubawk leh Lawipu LTF-te a tlawh a, Rs. 30,000 ṭheuh a hlân. Zaithanzama chuan, LTF-te inpekna fakawm a tih thu a sawi.
AMC ward IX councillor B Lalawmpuii chuan Saron Veng LTF-in an venga Presbyterian Kohhran hall leh YMA Indoor Stadium-a community covid care centre an siam mek a tlawh a, an mamawh tur hrang hrangte a hlân.
AMC ward XVII councillor David Zohmangaiha pawhin Republic Veng LTF hnenah in chhunga virus tihfaina atan Ulf Fogger leh CCCC-a awmte leh enkawltute ei leh in tur a pe bawk.