Haw tharte'n an hmun tur an thleng
Mizoram mi leh sa, Covid-19 inkharkhip vanga Delhi leh West Bengal-a tangkhang Mizorama rawn hawte chuan an inkhungna tur an thleng vek tawha hriat a ni.
Delhi leh West Bengal aṭanga haw Champhai district mi 109 chuan nimin khan Champhai an thleng a, Vanlallawma Indoor Stadium kawtah SP Rex Zarzoliana, SDO (Sadar) Lalnunfela Chawngthu, additional SP C Lalengliana leh medical team-te'n an lo dawngsawng.
Champhai district mi hawte hi Delhi aṭangin mi 103 leh West Bengal aṭangin mi paruk an ni a, rapid antibody test (RAT) an paltlang vek. Tlangsama Polytechnic quarantine centre-ah mi 91, Tourist Lodge-ah mi panga, DPRC, Keifangtlangah mi pathum, Dinthar Veng Presbyterian Kohhran Hall-ah mi paruk dah niin, home quarantine mi pali an awm. Hetih lai hian, Goa aṭanga haw Champhai district mi 65 (mipa 15 leh hmeichhia 50)-te chuan vawiin hian Champhai an thlen beisei a ni.
Khawzawl district mi leh sa, Nagpur aṭanga haw mi paruk, Chhatisgarh aṭanga haw mi pahnih, Delhi aṭanga haw mi 37 leh West Bengal aṭanga haw mi parukte chuan nimin khan Khawzawl an thleng a, Zuchhip Field-a screening point-ah district bawrhsap H Lianzela, Khawzawl SP leh medical team-te'n an lo dawngsawng.
Khawzawl district mite hi endik an nih hnuah Khawzawl Vengthar Presbyterian kohhran hall-ah mi 37, Dinthar Presbyterian kohhran hall-ah mi paruk, Venglai Presbyterian kohhran hall-ah mi paruk leh PWD staff lodge-ah mi pahnih dah an ni.