Mizoram Eklavya Model Residential School Society an ṭhukhawm

Mizoram Eklavya Model Residential School (EMRS) Society chu nimin khan a ṭum khat nan an chairman Dr K Beichhua, Social Welfare minister hoin SAD conference hall-ah an ṭhukhawm.

Social Welfare Minister chuan, Covid-19 vangin rilruah thil dang a leng thei meuh lo tih sawiin, "Nakin­ah kan la tawn chhoh tur tho a nih avangin meeting hi chawpchilh taka koh a ni," a ti.

Meeting-ah hian EMRS kalphung te, zirna kawnga tribal naupangte an hnufual bik loh nana Ministry of Tribal Affairs bultuma kalpui a nih dante leh, Mizorama EMRS kalpui dante sawi a ni a; mipuiin EMRS an hmelhriat theih nan hmalak dan tur an sawiho.

EMRS din nan hian khawtlangin acre 20-a zau ram an pek a ngai a, tlang ramah EMRS pakhat sak nan Minis­try of Tribal Affairs chuan cheng vbc. 24 a ruahman ṭhin. EMRS-ah hian naupangte a thlàwnin zirtir an ni a, uniform, lehkhabu leh an mamawh chi hrang hrang a thlawn veka pek a ni. Residential school a nih angin, naupangte chu hostel-ah an awm vek a, an ei leh in pawh a thlàwn veka pek a ni bawk.

Ministry duh dan angin, EMRS-te hian Central Board of School Education (CBSE) an zawm a ni. Mizoramah EMRS hi Serchhip leh Lung­leiahte din a ni tawh a, academic session tharah Ngopa, Lawng­tlai leh Chawngteahte hawn tuma hmalak mek a ni.