CCC-a chaw petute an mangang : Chaw man sorkarin a batsak nasa

Covid-19 veite enkawlna, Covid Care Centre (CCC) hrang hranga ei leh in (chaw) petu catering service-te hnenah Mizoram sorkarin sum eng emaw zat a bá mek a, hei vang hian chaw petute chu an mangang tawh hle. Ṭhenkhat chu nikum lam aṭanga a bat tawhte a nih bakah, catering service pakhat chu cheng nuai 28 vel a batsak mek.

Vanglaini palaiin CCC-a chaw petu caterer ṭhenkhat a biaknaah, catering neitute chuan CCC-a awmte ei tur an pêk chu vawi khat ei man Rs. 150 a ni a, ni khatah mi pakhat tan Rs. 300 a nih thu an sawi. CCC pakhatah mi 200 an awm tlin chuan, ni khata ei leh in an pek man chu Rs. 60,000 a ni.

Mizoram sorkar (Health department) chuan May 19, 2021-a notification a tihchhuahah, CCC-a awmte chu ei leh in man mahni intum a ngaih tawh tur thu a tarlang a; mahse, a hnu ni hnihna, May 21-a notification an tihchhuah lehah chuan, CCC-a awmte mahnia ei leh in man intum tura tih chu paih leh a ni thung.

Caterer-te chuan, sorkarin pawisa eng emaw zat a batsat avang hian an pawisa hmuh tur angte an dawn mai loh chuan CCC-a chaw pek chu an tlin tawh loh mai an ring ṭan tih an sawi a, "Bill kan lâk theih si loh chuan pek zel pawh a hautak hle dawn a ni," an ti.

Sorkarin CCC-a awmte'n an ei leh in man anmahni'n an pek a ngaih tawh tur thu May 19, 2021-a a chhuah avangin, bá awm vak loin ei tur an pek man an dawng zel thei dawna an hriat avangin an phûr hman hle tih an sawi a; mahse, a hnu lawkah sorkarin a sût leh avangin an manganna chu a ngai bawk a ni leh ang tih an hlauhthawn thu an sawi bawk.