VC-te tana sum ruahman Sorkarin a sem dawn hnai

Sorkar laipuia Ministry of Finance chuan May 8, 2021 khan state 25-a rural local body (RLB)-te hman turin kum 2021-22 atan first instalment cheng vbc. 8,923.8 a pe chhuak a, Mizoram chu cheng vbc. 13.8 pek a ni. Mizoramin sum a dawnte chu a hmangtu tur VC-te hnenah pek thuai tum a ni.

Vanglaini palai zawhna chhangin LAD minister K Lal­rinliana chuan, VC-te sum dawn tur sorkar laipui aṭanga hmuh cheng vbc. 13.8 chu sem chhuah a la ni lo tih sawiin, "VC-te'n an chan zat tur chu population based-in tihfel sa vek a ni. Sum hi dik taka a hmanna tura hman a nih theihna atan uluk lehzuala VC-te zirtir a ngai. LAD lam kan inpeih hunah pek nghal mai theih a ni a, pek chhuah a ni ṭêp tawh," a ti.

LAD Minister chuan, sum chu Covid-19 dona atan hman theih a nih thu sawiin, "Chutihrualin, sum sem chhuah danah Covid-19 hluar leh hluar lohna hmun thliar hran theih a ni lo. Guideline fel tak awm sa a ni a, chumi pêl chuan thil tih theih a ni lo," a ti a; sorkar laipuiin guideline pêla thil tih a nih lohna turin khauh taka a vil thu a sawi.

Pawisate chu VC-te'n a ṭangkai thei ang berin hmang se a duh thu sawiin K Lalrinliana chuan, "Mipuite'n ṭha an tih leh duh dan ngaih pawimawh tur a ni. Khawtlang tana ṭangkai tur thawh a nih hunah pawh inhlawhnate a vàn avangin mipui a tam thei ang inhlawhna awm thei lam ngaihtuah a ṭul ang. Covid-19 dona atana hman theih a nih angin, ṭangkai takin VC-te'n hmang thiam se a duhawm," a ti.

Finance department aṭanga Vanglaini thu dawn danin, Ministry of Finance-in sum a pek chhuah chu 15th Finance Commission-in RLB-te tana a ruahman a ni. VC-te'n an huam chhunga hmasawnna hna an thawhna tur a nih piah lamah, Covid-19 a lèn nasat lai a nih avangin an duh chuan Covid-19 dona atan an hmang thei dawn. Sum hi VC-te chan tur a ni a, local council-te a huam lo.

May 8, 2021-a sum pek chhuah hi kum 2021-22 atana Mizoram budget tura telh sa a ni a, a hranpaa Covid-19 dona atana sorkar laipuiin a pek a ni lo. VC-te'n an huam chhunga hma­sawnna hna an thawhna tura tih a nih rualin, an duh chuan Covid-19 dona atan an hmang thei dawn a ni.