Health Minister-in cancer kháwl a enfiah
Health minister Dr R Lalthangliana chuan nimin khan Zemabawka Mizoram State Cancer Institute (MSCI), a bula Tertiary Care Cancer Centre leh Central Medical Store-te a tlawh a; Recreation Counselling Centre, Zemabawka cancer vei damlote chawhmeh man atan Rs. 10,000 a pe.
Health Minister hian cancer hospital bula Tertiary Care Cancer Centre (cancer hemna khawlpui)-a cancer hemna kháwl lian LINAC (Model TrueBeam svc with FFF) leh Brachy Therapy Machine hman mek te, cancer hospital-a cancer hemna khawl dang cheng vbc. 11 man Cobalt-60 dahna tur hmunte a enfiah. Khawl thar siamtu company engineer-te chu Covid-19 léng avangin Mizoramah an kal thei rih lo a ni.
Cancer hemna khawl endiktu tur leh buntu turte chu a rang thei ang bera an rawn kal a ṭul thu sawiin R Lalthangliana chuan, rang taka intir turin company hotute a nawr tur thu a sawi a; ZMC-a oxygen generating plant din tura company mithiamte pawh a koh luh tawh thu a sawi.
Health Minister hian Zemabawka Central Medical Store pawh tlawh nghal a; hripui léng dona atana damdawi leh hmanraw hrang hrang dinhmun a enfiah a ni.