KHAWTHLIR
CM Relief Fund pe
Chief Minister's Relief Fund for Covid-19 ah nimin khan SEDP hnuaia board zawng zawng (14)-te'n Rs. 50,000 ṭheuh an thawh a, a vaiin Rs. 7,01,000 a ni. Chanmari Presbyterian Kohhranin Rs. 3,00,000 leh Leitan South Presbyterian Kohhranin Rs. 1,00,000 an thawh a, pawl/mimal pathum dangin pawisa an pe lut bawk a; nimina sum lut zawng zawng chu Rs. 12,24,000 a ni.
Stationery dawr
Mizoram sorkar chuan nimin khan notification chhuahin, zirlai, online examination tur neite leh stationery mamawhte an lei theih nan, total lockdown laia dawr hawn hun bituka dawr hawn theih zingah stationery dawrte telh a nih thu a tarlang. Stationery dawrte chu vawiin leh May 28, Zirtawpniah zing dar 5 aṭanga tlai dar 5 inkarah task force-te hriatpuinain hawn theih a ni ang a, mamawh lei turte'n LTF/VTF aṭangin phalna an lâk a ngai bawk.
Kal dan tur rél
Serchhip District Task Force on Covid-19 member-te leh Serchhip Joint VC hruaitu te, VC leh MJA aiawhte chuan nimin khan total lockdown inkhuahkhirhna thar kalpui dan tur an sawiho a, DC mawhphurhna la mektu additional DC Lalmuansanga Ralte-in a kaihruai. CM Relief Fund aṭanga mi harsate ṭanpuina tur Rs. 2,50,000 sem dan tur leh disinfectant team din an rêl bawk.
Tanpuina hlân
Mizoram Unversity Mizo Zirtirtu Forum chuan Covid-19 leh a kaihhnawih puala sum an thawh khawmte chu nimin khan an sem a; Aizawla veng pariat - Tanhril, Hunthar Veng, Edenthar Veng, Muanna Veng, Maubawk, Lawipu, Bethlehem Veng leh Bethlehem Vengthlang local task force-te hnenah Rs. 25,000 ṭheuh an hlân.
Containment zone thenkhat hlîp
Aizawl Bawrhsapin Aizawla hmun ṭhenkhat, Covid-19 containment zone-a a puan tawh zinga Kanan Veng, Bethlehem Veng leh Chanmari venga hmun ṭhenkhatte chu an dinhmun a ziaawm tawh avangin containment zone a nihna hlih a ni tawh.
MIzoram panpui
Covid-19 vei, May 23, Pathianni chawhnua RTIICS Hospital, Kolkata-a thi CL Remruata (47) s/o Rev. C Ngurhnema, Zotlang, Aizawl ruang chu nimin tlai khan Kolkata aṭangin lirthei hmangin Mizoram panpui a ni. Calcutta Mizo Welfare Association leh Calcutta Mizo Christian Fellowship chuan Pathianni zan dar 9 khan CL Remruata thlahna leh sunna inkhawm an buatsaih a ni.
Chhawmdawlna semah PC lawm
Peoples' Conference party chuan thuchhuah siamin, Chief Minister Relief Fund for Covid-19 aṭanga Aizawl district-a khawsak harsa zawkte chhawmdawlna tur Rs. 61,50,000 sem chhuah ṭan a ni chu lawmawm an tih thu an tarlang. Chhawmdawlna chu chak tak leh rualkhai taka sem chhuak ṭhin turin Mizoram sorkar an beisei tih an sawi bawk.