Aizawla CCCC dinhmun thlirho

Aizawl Municipal Corporation (AMC) huam chhunga Covid Care Facility Management Committee chu nimin khan IPR Auditorium-ah an chairman Dr ZR Thiamsanga, MLA hoin an ṭhukhawm a, community covid care centre (CCCC) dinhmun an thlirho.

Ṭhutkhawmah hian Bethlehem Vengthlanga Forest Training Centre leh Advanced Research Centre for Bamboo and Rattan chu CCCC atan mamawh a nih thu tarlan a ni a; lo bawhzui turin Aizawl East Chief Medical Officer (CMO) an ruat.

Durtlang Leitan pawhin CCCC an mamawh thu dawn a nih avangin, a ṭul anga hma la turin CMO ruat nghal a ni a; CCCC aṭanga inchhuahtir chungchangah CMO emaw medical officer emawte nen inberáwn chungin, sorkar kaihhruaina angin kalpui ni se, an ti.

CCCC-a enkawl Covid-19 vei damlo, State Referral Hospital (ZMC)-a thawn (refer) chungchangah, CCCC-a duty tur doctor, Indian Medical Association (IMA) aṭanga ruatte'n CMO kaltlangin remruatna siam ni se, an ti a; CMO-in ambulance a ṭul angin a ruahman ang.

Meeting-a tarlan danin, AMC chuan Covid-19 kaihhnawih bawlhhlawh paihna atan motor an hmang a, bawlhhlawh paih kawngah harsatna a awm lo.

CCCC hi veng bil deuh bikte tana ruahmanna siam ni mah se, ṭhenawm leh veng bulhnaia mite'n a ṭul a nih chuan local task force-te inberáwnin, mamawh bikte tan ruahmanna siam ṭha an ti bawk.

Tun dinhmunah Aizawl East CMO leh Aizawl West CMO huam chhungah CCCC 70 a awm mek a, Covid-19 vei mi 352 enkawl mek an ni.

Covid Care Facility Management Committee-ah hian Aizawl DC Dr Lalhriatzuali Ralte, AMC commissioner K Laldingliana, IDSP state nodal officer Dr Pachuau Lalmalsawma, Aizawl East CMO Dr Hmingthanmawii leh Aizawl West CMO Dr Thani Pachuau te an tel.