MCAB-in PFMS chungchang an sawifiah
Mizoram Cooperative Apex Bank (MCAB) chuan thuchhuah siamin, zirlaite scholarship pek chhuah chungchang an sawifiah a; Public Financial Management System (PFMS)-in MCAB an pawm loh avanga pre-matric scholarship sem thei rih lo anga sawi a awm chu thil hriat fuh tâwk loh a awm vang niin an tarlang.
MCAB chuan, kum 2015 aṭangin PFMS an hman tawh thu an tarlang a, "Thil thar awm ang zela update reng a ni a, a ṭul angin a in update reng bawk. Bank pawm leh pawm loh hi PFMS website www.pfms.nic.in ah en theih reng a ni," an ti.
Zirlaite'n a hma thei ang bera scholarship an lâk an duhsak thu leh a theih ang anga an ngaihven reng thu tarlangin MCAB chuan, PFMS kaltlanga scholarship sem chu thil thar a nih avangin khawi maw laiah chuan technical problem a awm theih thu an sawi.
Apex Bank chuan, scholarship chu zirlaite'n online registration hmanga an dilin, an bio-data, bank detail bakah, nihna tihchian nan Aadhaar number dik tak chhut luh a ngaih thu te, data a tam tham avangin hlâwm khatin a ruala thun ngei a ngaih thu te, zirlai sang eng emaw zat karah data dik lo pakhatin harsatna a siam theih thu te, bank pahnih avanga scholarship lak mai theih loh anga thuthang awm chu pawi an tih thute an tarlang.
Mizoram Scholarship Board (MSB) leh Apex Bank chu ṭha taka an thawh dun ṭhin thu tarlangin MCAB chuan, "Data upload-a harsatna awm pawh chinfel mek zel a ni a, tun aṭanga hun rei lo têah zirlaite'n scholarship an dawn theih ngei a beiseiawm," an ti a; zirlaite chu mangang lo tur te, scholarship lâk nan Apex Bank account hman theih a nih thu leh, harsatna neite pui tura an inkau reng thute an tarlang bawk.
Tarlan tawh angin, MSB chuan pre-matric scholarship chu May 2021 thla chawhma lam khan sem theih an inbeisei. MSB hotute sawi danin, MSB-in scholarship dawng tur zirlai an endik tawhte bank account-a pawisa pe leh ṭhintu PFMS-in India Post Payments Bank (IPPB) leh Apex Bank-te a accept (pawm) thei rih lo a ni.
MSB hotute chuan, IPPB leh Apex bank hotute nen harsatna chu an buaipui mek thu te, bank pahnih tel lo pawhin scholarship chu sem theih tho mah se, zirlai 500 velin scholarship dil nan an hman avangin a ruala pek chhuah theih dan tur buaipuia hma an lak thute an sawi bawk.