EFCC department hmalakna sawiho

Environment, Forest & Climate Change (EFCC) minister TJ Lalnuntluanga kaihhruaiin nimin khan EFCC hotute'n kum 2020-21 chhunga department hmalakna leh kum kal mek atana hmachhawpte video conferencing kaltlangin an sawiho.

TJ Lalnuntluanga chuan, Covid-19 léng karah ramngaw humhalh a pawimawh zual zel tih sawiin, "Ramngaw leh nungcha pawimawhna a takin Mizoram pawhin kan tawng chho mek. Thing phun hi hunbi nei a nih avangin kumin fûr ruahtui tlak laia a tam thei ang ber phun a nih theih nan hmalak a ṭul," a ti a; ramngaw leh nungcha humhalh chu hripui léng avangin thlahdul theih a nih loh thu a sawi.

Meeting-ah hian kumin Green Mizoram Day-a thing ṭiak sem dan tur te, thing phun enkawl zui dan tur leh Centrally sponsor scheme (CSS) hnuaia project kal mek leh hmachhawp hrang hrangte sawiho a ni.

Green Mizoram Day hi Aizawl district-ah chuan Mizoram College of Nursing (MCON) complex, Falkawnah hman tura ruahman a ni a, thing phun hnatlang neih a ni ang.