MLA leh councillor-te an che chhuak

MLA Lalduhoma chuan nimin khan a bial, Serchhip constituency chhunga khua leh vengte a fang a, task force hrang hrangte an duty-na hmunah tlawhin, an dinhmun a zawt a, task force tin hnenah pawisa a hlân. Lalduhoma chuan, task force-te chu mamawh leh puih an ngaihnate a hnena thlen zel tura chahin, puih zel a tum thu a sawi.

ZPM Serchhip Block chuan, an bialtu MLA-in thlan tlin leh a nih hnu lawkah a bial mamawhte a buaipui nghal a, Covid-19 veite phurhna tur motor hman nan thla khat atan Rs. 30,000 a tum bakah, Mat phai Chamdur zaua link road laih nan Rs. 1,50,000 a tumsak tawh tih an tarlang.

AMC Ward-III councillor C Lalchhandami chuan a thawh thumna atan nimin khan a bial chhunga veng pangaa taxi stand pakuaa ding ṭhin driver 122 vel tan chhawmdawlna leh ṭanpuina Rs. 30,500 a sem. A biala zirlai harsatna tâwkte tan LTF panga hnenah Rs. 25,000 leh, hripui vanga damlo leh harsatna tâwk eng emaw zat hnenah ṭanpuina a pe tawh bawk.

C Lalchhandami chuan, taxi khalha eizawngtute chu hun harsa leh buai karah pawh mi tin tana malsawmna an nih ṭhin thu sawiin, rinawm leh taima taka hna thawk zel turin a fuih a, "Pathian ṭih chunga hna in thawh chuan Lalpa’n a kalsan ngai dawn lo che u a ni," a ti.