Central Jail-ah hripui vei 21 an awm : Hotute'n hmalak zui dan tur an sawiho

May 24, Thawhṭanni khan Central Jail-ah Covid-19 vei mi 20 hmuh chhuah a ni a, a hmain mi pakhat hmuh chhuah a lo ni tawh bawk. Jail-a hripui vei hmuh chhuah chungchangah hian nimin khan Home minister Lalchamliana chuan Home, Prison leh DMR department hotute kâwmin, hmalak zui dan tur a sawipui.

Thu dawn danin, Central Jail-ah hian Thawhṭanni khan mi 43-te swab sample endik zinga mi 20 chu Covid-19 positive an ni tih hmuh chhuah a ni a, an vaiin jail-a lut tharte leh anmahni buaipuitute vek an ni. Jail-a lut thar tho mi pakhat chu hripui vei a ni tih May 5, 2021 khan hmuh chhuah a lo ni tawh bawk a; chumi aṭanga inkâi chhâwng zel nia ngaih a ni.

Central Jail-a lut tharte chu a awm sate nen an inhnaih loh nan pindan hrangah hun eng emaw chen dah phawt an ni ṭhin a; jail-a táng sate zingah lut tharte kaihruaitu atana dah mi pakhat tih loh chu hripui vei hmuh an awm rih lo.

Nimina ṭhutkhawmah hian Home minister Lal­chamliana chuan, Prisons department-in Central Jail-a táng awm mekte leh thawktu, vênthàwn ngai zualte swab sample, RT-PCR hmanga endik tura Chief Medical Officer hnena dilna an thlen tawh chu chak taka bawhzui ni se a duh thu a sawi. District Jail-a thuneitute pawh theihtawp chhuaha fimkhur turin a chah bawk.

Meeting chuan, Covid-19 vei mekte enkawlna atan personal protective equip­ment (PPE), hmai tuamna, kut tihfaina, pulse oxymeter leh infrared thermometer-te chu a ṭul anga ngaihtuah ni se, an ti a; hripui vei an pun zel palh pawha ruahmanna siam dan tur an sawiho nghal.

Central Jail tan hian Disaster Management & Rehabilitation department chuan PPE 50, hmai tuamna 600 leh kut tihfaina litre 5 an pe nghal a ni.