Upa, hmeithai leh rualbanlote'n an dawn tur an hmu lo rei tawh : An dawn tur K-deposit-ah dah a ni

Social Welfare department (SWD) hnuaia pension hlawh la ṭhin kum 60 chin chung lam te, hamṭhatna dawng ṭhin hmeithai leh rualbanlote chuan hun eng emaw chen an dawn tur sum an dawng tawh lo. An sum dawn turte chu K-deposit-ah dah a ni.

Vanglaini-in thu a dawn danin, SWD hnuaiah hian kum 60 chin chung lamte'n hamṭhatna an dawn theih pension scheme - Indira Gandhi National Old Age Pension Scheme (IGNOAPS) a awm a; hmeithai harsate'n hamṭhatna an dawn theih - Indira Gandhi National Widow Pension Scheme (IGNWPS) leh rualbanlote'n an dawn Indira Gandhi National Disability Pension Scheme (IGNDPS) a awm bawk.

Heng pension scheme hrang hrang atan hian sorkar laipui leh state sorkarin sum an inthawh ṭâwm ṭhin a, a tam ber chu central-in a tum ṭhin. Central chuan pension hlawh tur hi eng emaw chen atan an pe chhuak tawh a, mahse, Mizoram sorkarin K-deposit-ah a dah avangin hun rei tak chhung pension hlawh pek chhuah a ni tawh lo.

Pension scheme sum dinhmun
IGNOAPS: Tar pension scheme hnuaiah hian kum 60-79 inkarte tan pension Rs. 200 (central) leh Rs. 100 (state), a vaiin thla khatah Rs. 300 pek a ni a, kum 80 leh a chung lamte hnenah Rs. 500 (central) leh Rs. 100 (state), a vaiin thla khatah Rs. 600 pek ṭhin a ni.

Pension late hnenah hian October 2020 thlenga pek tur sum pek chhuah (release) a ni tawh a, state sorkar tum tur, mi pakhat tan Rs. 100 pawh September 2020 thleng daih sem tura pek a ni tawh.

November 2020 aṭanga March 2021 chhung atan sorkar laipui aṭangin sum hmuh tawh a ni a, pek chhuah a nih theih nan Finance department aṭangin sanction order hmuh tawh a ni. Sum hi K-deposit-ah dah mek a ni a, SWD chuan a hma thei anga pe chhuak tura dilna an thehlut tawh a, an dawn veleh sem a ni ang.

IGNWPS: Hmeithai pension scheme hnuaia hamṭhatna dawngtute hnenah Rs. 300 (central) leh Rs. 100 (state), a vaiin Rs. 400 thla khat atan pek ṭhin a ni.

Hmeithai pension atan hian September 2020 thleng sum pek a ni tawh a, October 2020 leh March 2021 inkara pension pek tur sum chu central leh state aṭangin SWD-in sanction order an hmu tawh a, K-deposit-ah dah mek a ni. K-deposit aṭanga pek chhuah dilna SWD-in an thehlut tawh a, an ngaichâng mek.

IGNDPS: Rualbanlote hamṭhatna scheme hnuaiah a dawngtu, pianphunga rual­banlote hnenah Rs. 300 (central) leh Rs. 100 (state), a vaiin thla khatah Rs. 400 pek a ni ṭhin. Pension late hnenah central share chu September 2020 thleng pek tawh a ni a, state share chu August 2020 thleng pek tawh a ni thung.

Hamṭhatna la sem hmabak October 2020 leh March 2021 inkara central share leh Sep­tember 2020 leh March 2021 inkara state share-te chu central leh state sorkarte'n an pe chhuak (sanction) tawh a, Treasury aṭang pawhin release a ni tawh. A dawngtu turte hnenah district office kaltlanga sem chhuah vat tum a ni.