Covid-19 thawh hnihnaah migrant worker 39 inhriattir

Covid-19 léng thawh hnihnaah state páwna hna thawk, hripui vanga an hna thawk chhunzawm thei lo (migrant worker) Mizoram Youth Commission (MYC) a inhriattir tawh nimin thleng khan mi 39 an awm.

MYC chuan May 7, 2021 khan thu­chhuah siamin, India ramah Covid-19 thawh hnihnain nasa taka ram a nghawng mek thu an tarlang a; state hrang hranga Mizoram mi leh sa hna thawk, hripui léng vanga Mizorama hawte chhinchhiah leh mimal taka hriat chian a nih theih nan ruahmanna an siam a ni.

MYC-a migrant worker inhriattir tawh mi 39-te chu hmeichhia 30 leh mipa pakua an ni a; Maharashtra state-a hna thawk tam berin mi pariat an awm. Mi dangte chu Pune, Mumbai, Goa, Bangalore, Kolkata leh Chennai-a awmte an ni hlawm a, hotel leh spa-a thawk an ni tlangpui.

Nikuma Covid-19 a lên khan MYC-ah migrant worker 2,637 an inhriattir a, NEC aṭanga sum hmuh hmangin mi eng emaw zat chu training chi hrang hrang neihpui an ni. Tun ṭuma inhriattirte tan training buatsaih a nih dawn leh dawn lohah erawh thutlukna siam a la ni lo.