May thlaa hripui vei hmuh zingah Kum 21-30 inkar an tam ber

Mizoram sorkarin Covid-19 dinhmun chîk zawka scientific evidence nen zir chiang tura a ruat State Research Unit on Covid-19 member-te chu nimin khan Health minister Dr R Lalthangliana hoin SAD conference hall-ah an ṭhukhawm a; kumin May thlaa hripui vei hmuh chhuahte kum 10 bia ṭhenah, kum 21-30 inkar an tam ber tih tarlan a ni.

Ṭhutkhawmnaa tarlan danin, kumin May thla, ni 1-24 chhungin Covid-19 vei mi 4,490 hmuh chhuah a ni tawh a; chu'ng zingah chuan kum 10 bia ṭhenah, kum 21-30 inkar tam berin, mi 1,092 an ni a, kum bithliah dangah positive sang khat tling an la awm lo.

May thlaa hripui vei hmuh tawh mi 4,490 zingah upa lam an tam lo a; kum 61-70 inkar mi 165, kum 71-80 inkar mi 87 leh kum 80 chung lam mi 27 an awm a ni.

Health Minister chuan, State Research Unit on Covid-19 chu an pawimawh thu sawiin, "Data felfai tak la khawm a, kan dinhmun dik tak zir a nih chuan hri kan inkai darh dan chiang leh felfai zawkin a hriat theih ang a, third wave lo thleng tur an sawi atan pawh invên lâwk dan turte kan hriat chian phah thei dawn a ni. Thil chi hrang hrang zir chian ngai a awm," a ti.

Dr R Lalthangliana chuan, Covid-19 vei enkawl dam tawhte leh thite medical history zir chian a, inenkawl dan tur hriat thiam lehzual a nih theih a beisei thu te, thil danglam bik emaw, hmun dang nena Mizoram inan lohnate a awm phei chuan a pawimawh lehzual dawn thute a sawi bawk.

Chief secretary Lalnunmawia Chuaungo chuan, Covid-19 léng thawh khatnaah chuan chawlhkar khat chhung lockdown a nih chuan positive hmuh chhuah a tlakhniam ṭhin thu a sawi a, "Tun ṭumah erawh chuan thla khat chuang kan inkhàrkhip chung pawhin tlakhniam lam kan pan thei lo. Ngaihdan leh rin thu tam tak a awm thei ang a, mahse, chhan ṭha tak dangte pawh a awm theih avangin data nen scientific evidence hmanga kan zir chian hian kan dinhmun dik tak hriat theih a rinawm a ni," a ti.

Ṭhutkhawmah hian zirbingna tur péng hrang hrang sawiho a ni a, data lak khawm dan turte leh thil pawimawh hrang hrang an sawiho a ni. State Research Unit on Covid-19 ah hian Health secretary R Lalramnghaka chu chairman a ni a, state nodal officer on Covid-19 Dr Pachuau Lalmalsawma chu Secretary a ni. Member atan Mizoram University, Pachhunga University College, CVSAH, ZMC, IDSP leh Health department mithiamte an awm.