KHAWTHLIR

Thisen pe
KṬP, Leitan Pastor Bial chuan nimin khan Synod Hospital Blood Bank-ah thisen pek an huaihawt a, thisen unit 76 an pe a, petute mipa 58 leh hmeichhia 18 an ni.

Phaisen entry point
Kolasib district magistrate Dr H Lalthlangliana chuan, Phaisen entry point-ah Thawhṭanni leh Ningani chawhma dar 10 aṭanga tlai dar 6 inkarah mihring (passenger) phur lirtheite luh phal a nih thu leh Covid-19 an vei leh vei loh endik zel tur a nih thu a puang. Mipui ni tin mamawh phur lirtheite erawh chu englai pawha luh phalsak an ni a, driver leh handyman-te chu Covid-19 screening tih vek tur a ni.

Containment area
Khatlaa hmun ṭhenkhat (Khatla-V), Tanhril Vengthar Section-IV, Muanna Veng, Zarkawt leh Saron Venga Covid-19 vei tam zualna hmunte chu nimin zing dar 5 aṭang khan Covid-19 containment area-ah Aizawl DC Dr Lalhriatzuali Ralte-in a puang.

Zirlaibu PDF
State Council of Educational Research and Training (SCERT) chuan pawl 1 - 8 zirlaibu a thlawna download theihna an siam a, zirlaibu PDF chu https://scert.mizoram.gov.in/# ah download theih a ni.

Ar sa rate zawm tum lo
All Mizoram Poultry Farmers's Association (AMPFA) chuan thuchhuah siamin, arsa rate siamṭha tura May 24, 2021-a AMPFA leh Arsa Zuar Association-te'n Mizoram sorkara an thlenin awmzia a neih loh avangin, sorkarin ar sa rate a siam chu zawm an tum loh thu an puang. AMPFA hian ar vulhtute chu ar man kg. khatah Rs. 200 aia tláwma pe lo tur leh ar sa zuarte chu kg. khat Rs. 350 aia tláwma zuar lo turin an ngen a ni. Hetianga thutlukna an siam chhan chu, ar chaw leh ar note manin san lam a pan zel vang a nih thu leh mipui hriatthiamna an ngen thu an tarlang.