Zirlaite'n zirlaibu an hmuh thuai theih nan Ṭan lak a ni dawn - Education Minister

Nimin khan Planning conference hall-ah Covid-19 léng kara zirna kalpui zel dan tur sawiho a ni. School Education minister Lalchhandama Ralte chuan, zirlaite'n zirlaibu an hmuh thuai theihna atan ṭan lâk a ni dawn tih a sawi.

School Education Minister chuan, hripui léng karah zirna kalpui zel a ngaih thu sawiin, "Mahni thiam dan dana online-a zirtirna kalpui chuan thlen chin a inang lo zung ang tihte pawh a hlauhawm a, chuvangin, khairual taka kalpui theih dan zawn a ṭul. Zirlaibu pawh sem chhuah dan kawng ruahman a ni dawn a, zirlaite'n zirlaibu an hmuh thuai theih nan ṭan lak a ni ang," a ti.

Mizoramah zirna ṭha a awm theih nan ruahmanna siam zel a ṭul tih sawiin Lalchhandama chuan, "Tuna kalphungah chuan private boarding school ṭha tak, ram dang nena khaikhin pawha zahpuiawm loh miin din duh se, kawng a awm meuh lo," a ti a; miin service an pek theih dan azira fee an lâk theih dan tur pawh siam a ngai nia a hriat thu a sawi.

Human Resources Development Board vice chairman L Thangmawia, MLA pawhin thu sawiin, nikum lama online class neih dan chu research tia an zir chian thu a sawi a, "Online class hi zirlaite tan khairual taka neih theih ni rih lo mah se, zirtirna pek dan kawng awmchhun a nih rih avangin mumal zawka neih dan ruahman a ngai. Online class-ah zirtirtu leh zirlaite pawhin training an neih a ngai hle," a ti.

School Education secretary Dr Lalzirmawia Chhangte sawi danin, sorkar laipuia Ministry of Education hnuaia School Education & Literacy buatsaihin India rama board hrang hrang leh central minister-te nen May 23, 2021 khan online meeting neih a ni a; CBSE, ICSE leh state board zawng zawng deuh thawte'n board exam an la buatsaih thei lo a, Mizoramah chuan harsatna awm loin tluang taka buatsaih a ni.

Ṭhutkhawmah hian, sikul hrang hrangte'n khairual taka zirna an kalpui theih nan kaihhruaina siam an rel a; kaihhruaina siam turin Human Resources Development Board Vice Chairman kaihhruai committee an din a ni.