Ram hruaitute an che chhuak mek

Covid-19 hripui léng leh inkhârkhip avangin ram hruaitute chu an bial chhungah ṭanpuina leh chhawmdawlna hna thawkin an che chhuak mek zel a; niminah pawh khan mi eng emaw zatin ṭanpuina an pe.

Minister Dr R Lalthangliana chuan nimin khan a bial, South Tuipui chhunga khaw hrang hrang village task force 22 leh police duty-te hnenah dailuah ip 50, alu ip 50 leh tel báwmpui 33 a pe a ni.

Minister C Lalrinsanga pawhin nimin khan a bial Lunglei West chhunga khaw hrang hrang - Káwlhâwk, Serte, West Bungtlang, Lungdai leh Sertlangpui VTF-te hnenah pawisa, kut tihfaina leh hmai tuamnate a pe. Minister thilpekte hi hi ṭanpuina dawngtu khuaa VTF-te hnenah MNF unit hruaitute'n an hlân.

Aizawl South-I bialtu MLA C Lalsawivunga leh AMC Ward-XVI councillor R Lalawmpuii te chuan nimin khan an bial chhunga College Veng, Bethlehem Vengthlang leh Republic Veng local task force-te hnenah hripui laka invènna hmanrua chi hrang hrang bakah, vawk hri laka invênna tur bleaching powder ip thum leh contactless handsanitizer khawl leh disinfectant eng emaw zat an pe.

Lunglei South bialtu MLA Dr K Pachhunga pawhin a bial chhunga mi harsate ṭanpuina tura a ruahman, 'MLA Buhzem' a siam chu May 24, Thawhṭanni khan Sethlun YMA Hall-ah hawn a ni a; Lunglei South biala khua/veng 37-a chhungkaw 1,700 hnenah VTF kaltlangin Rs. 15,00,000 hû ṭanpuina sem a ni.