RT-PCR bun tura mamawhte Zodintluanga'n damdawi-in a pe

Congress Legislature Party (CLP) leader Zodintluanga Ralte chuan, Civil Hospital, Lungleiah RT-PCR bun tum a nih tâk avangin, bunna tura mamawh hrang hrangte nimin khan damdawi-in hotute hnenah a hlân.

Zodintluanga Ralte chuan, sorkarin Lunglei Civil Hospital laboratory-ah RT-PCR a dah tawh tih a hriat thu leh lawmawm a tih thu sawiin, "RT-PCR hmang ṭangkai tura hmalakna leh sorkarin thu leh hla nei a, kháwl a hmang mai dawna ka hriat avangin, a hmanhmawhthlak tawh si a, sorkar tana awlsam zawkna a nih beiseiin RT-PCR khawlin a mamawh hmasa tur thil chi hrang hrang, consumables ka rawn pe leh a ni," a ti.

RNA extrator tel loin, manual-a hman a nih dawn chuan a hmanraw pek tâkte nen Gold Standard RT-PCR khawl chu Lunglei Civil Hospital-ah hman theih a nih tawh tur thu sawiin Zodintluanga chuan, "Laboratory changtlung din a nih meuh chuan RT-PCR hi duhthusama ṭhain run theih beisei a ni," a ti a; RT-PCR chu a rang thei ang bera hman ni se a duh thu a sawi.

Lunglei district-a Thorang bialtu MLA Zodintluanga Ralte hian June 2020 khan Lunglei leh chhim lam tana hman ṭangkai turin Civil Hospital, Lungleia hman tur RT-PCR khawl a pe a ni.