Oxygen chungchangah fimkhur turin chah

Champhai DC Maria CT Zuali chuan thuchhuah siamin, tun hnaiah India leh Myanmar ramri kânin Covid-19 vei damlote'n an mamawh oxygen bûr ni ngeia rin lâk luh a awm thu a tarlang a, fimkhur turin mipui a chah.

Maria CT Zuali chuan, oxygen cylinder emaw tia industrial gas cylinder-te hman palh a awm theih thu leh chu chuan Covid-19 behbàwm natna black fungus (Mucormycosis) a thlen theia hriat a nih thu a tarlanga, "Ramri kaltlanga sorkar hriatpui loha gas cylinder (oxygen cylinder nia chhàl) lak luh hi oxygen cylinder ngei a ni tih finfiahna a chuan loh avangin lei loh a him ber. Mizoramah oxygen mamawh ang kan la neih avangin buaina tur a awm lo a, oxygen cylinder chhehrelh hi dan kalh a ni," a ti.

Oxygen cylinder chu Drugs and Cosmetics Act, 1940 & Rules, 1945 hnuaiah khuahkhirh a nih thu te, State Drugs Controller aṭanga phalna nei lo tan siam, zawrh leh pek chhuah phal a nih loh thu te, ramri kâna lâk luh chu sorkar laipui thuneihna hnuaia awm a nih thu te, phalna nei loa oxygen cylinder phurh, zawrh leh semte chu Rs. 1,00,000 chawi leh kum 3-5 thleng lung-ina tàn theihna a nih thute a tarlang bawk.

Indian Pharma­copoeia (IP) 2010-in medical oxygen nihphung a tarlan dan chuan - mihring tan a him a ni tih lantirna a chuang tur a ni a, oxygen 99%V/V aiin a tlem tur a ni lo. Carbon monoxide awmzat 5ppm aiin a tam tur a ni lo a, carbon dioxide awmzat 300ppm aiin a tam tur a ni lo. Halogens, polymers leh oxidizing subtances lakah a fihlim tur a ni a; hnáwng (moistures) a pâi zat chu 67ppm% aiin a tam tur a ni lo.