Ruihhlo ngai Covid-19 veite Enkawl dan tur sawiho a ni

Nimin khan Social Welfare minister Dr K Beichhua hoin Secretariat conference hall-ah ruihhlo ngai zinga Covid-19 veite enkawl dan tur sawiho a ni.

Dr K Beichhua chuan, ruihhlo ngai, Covid-19 veite chu damlo dangte anga enkawl theih an nih loh thu sawiin, "A bik taka enkawl ngai an ni. Ṭhenkhat chu OST lak ngaite an ni a, damdawi a bika pek ngaite an nih avangin anmahni enkawlna atana a hrana treatment protocol siam a ngai. Lockdown avangin ruihhlo ngai enkawl mekte pawh an buai hle a, zan lama chhuak ru tâwkte an awm ṭhin a, natna thehdarhtu an nih theih avangin enliam mai theih an ni lo," a ti.

Ṭhutkhawmah hian, Jordan Centre, Seṭhawn chu ruihhlo ngai, Covid-19 veite enkawlna atan ruahman an rêl a, ruahmanna siam turin Health department leh Kolasib DC-te ruat an ni. Jordan Centre hi Covid care centre atan hman niin, Covid-19 vei mi 180 vel enkawl mek an ni a; tuna awm mekte chu nikum lama CCC atana hman tawh Polytechnic, Thingdawlah sawn ni se, an ti.

Meeting-ah hian Social Welfare, Home, Health & Family Welfare leh Excise & Narcotices department hotute leh MSACS hotute an tel a ni.