Inkhàrkhip dan hrang hrang thlirho
Serchhip District Task Force on Covid-19 chu nimin khan an chairman Dr Lalzirmawia Chhangte, district bawrhsap hoin DC meeting room-ah an ṭhukhawm a, inkhàrkhip thawh ngana atana dan hrang hrangte an thlirho.
Dr Lalzirmawia Chhangte chuan, June 30 thlenga inkharkhip leh turah ram pum huap dan leh Mizoram bik dan hriat pawlh hlauhawm tlem a awm tih sawiin, "National huapah June 8 aṭanga sakhaw hmunte hawn theih tih a nih laiin, Mizoramah chuan inkhawm leh punkhawmna lam chi khap zel a la ni," a ti a, inneih leh mitthi vuiah mi 20 chin tel phal a nih thu a sawi.
Dr Lalzirmawia chuan, zan lama curfew chungchangah, national-ah chuan zan dar 9 aṭangin tih a nih laiin Mizoramah chuan zan dar 7:30 aṭanga zing dar 4:30 a nih thu a sawi a, "Mi panga aia tam pun khawm khap thupek a la nung reng," a ti.
Meeting-a tarlan danin, Serchhip district mi state páwn aṭanga haw tawh zawng zawng chu mi 290 an ni a, an zinga 79 chuan inkhung hran hun an hmang zo tawh a ni.