Goa aṭanga hawte an rawn thleng

Covid-19 vanga tangkhang Goa aṭanga rawn haw mi 734-te chuan nimin chawhma dar 11 vel khan rélin Bairabi chawlh­hmun an thleng a; thermal thermometre hmanga enfiah an nih hnuah an district ṭheuha inkhung hranna tur hmun panpui an ni.

Goa-a tangkhang rawn hawte hi Kolasib DC H Lal­thlangliana leh SP Vanlalfaka Ralte hoin sorkar official-te'n an lo dawngsawng a, an thlen veleh rél chhungah ei tur pek nghal a ni. An ei/in zawhah screening point 10-ah enfiah an ni a, chumi hnuah an chuanna tur bus pantir an ni.

Nimina Goa aṭanga rawn hawte hi Aizawl district mi 426, Lunglei district 37, Ser­chhip district 50, Kolasib district 61, Champhai district 66, Siaha district 11, Mamit district 21, Lawngtlai district 24, Saitual district 16, Khawzawl district 14 leh Hnahthial district mi pariat an ni.

Rawn haw tharte quarantine centre thlenga phurtu tur bus driver leh conductor-te chu nimin khan Excise & Narco­tics department enforcement-te'n bus chhuah hmain an endik vek a, zúa fihlîm lo mi paruk an man.