Mizorama Covid-19 positive rate Kum 2020-ah 4%, 2021-ah 24%

Health & Family Welfare department chuan, kum 2020 chhungin Mizorama swab sample endik zingah 4%-in Covid-19 an vei thu leh kum 2021-ah chuan May thla thlengin sample endik zinga 24% hmuh chhuah a nih tawh thu a tarlang.

HFW department chuan Covid-19 vei tam zualna bikte containment zone-a puan a pawimawhna dan a tarlang a; "Expert group-te'n a ṭul an tih viau tawh hnu pawhin mahni veng/khuate inveng zo tura inngaih tlatna a awm ṭhin. Veng lûnlai leh langsar laiahte mi kan inkhap hneh viau emaw kan tih laiin, veng kilkhâwr deuhahte chuan Covid-19 nunphung dik zawm nachang hre lo tam tak an awm a ni," an ti.

Health department chuan, hmun ṭhenkhatah lehkha den, carrom board khelh leh ṭhenawmte tlawh kual deuh reng an awm thu te, chu'ng avang chuan hripui léng chu lockdown karah a darh zual zel nia a lan thu a tarlang.

Covid-19 chu natna dang anga enkawl chi a nih loh thu te, tuar na lo tam tak awm mah se, tuar náte dam chhuahna tur a hautak hle thute a tarlang bawk.

HFW department tarlante
1. Kan dinhmun thlirin tuna contact tracing kalpui dan hi a tâwk zo lo deuh niin a lang.
2. Veng hrang hrangah hotspot area zawn chhuah vat a, public health expert-te zir chiantir tura hriattir vat ṭhin a ṭha hle.
3. Active case search tih vat zel hi kan him tlànna tur niin a lang.
4. Containment zone puan a nih chuan uluk lehzualin a huam chhunga kái thei zawng zawng hmuh chhuah/enkawl zung zung a ni.
5. Containment zone-ah chuan medical team leh LTF-te’n active surveillance an nei ṭhin.
6. Active case search-ah hian contact tracing-a tel kher lote pawh in tinah kalin, rinhlelhawmte test/sample lak leh enkawlna a ṭul anga kalpui a ni.
7. Active case search vawi khat tih bakah, ni tin medical team-te'n an vil zui a, positive zawn chhuah leh a ṭul danin sample lak ṭhin a ni.
8. Containment zone veng ṭhenawm, positive case awm theihna àwmte a bika thlithlai reng a ni.
9. Containment zone hi positive an tam hnua puan a nih hian inkái chhâwng tur an inkài chhâwng viau tawh ṭhin.
10. Positive tlemtê an awm laia containment zone zímte puan thluah hi a finthlak zawk.
11. India ram hmun dangah chuan containment zone chhunga Covid-19 veite an dam kim aṭanga ni 14 chhung tal an la inkhuahkhirh ṭhin.
12. Mizoramah chuan mipui harsatna tihtlem nan ni 10 kalpui tura tih a ni.
13. Community spread awm mek a nih avangin contact tracing tan thlen phâk loh a tam tawh.
14. Containment zone chu medical team-te'n an vil ngun avangin contact tracing mila sample lak dan turah ruahmanna a siam zung zung theih.
15. Hri vei rinhlehte zawn chhuah vat a nihna turin containment zone chu zím deuh pawha puan zung zung leh a ṭul dana zauh zel a pawi lo zawk.
16. Veng tinin daily data siamin, zir chian a awl zawk nan veng chhung map, positive awmna inte chhinchhiahna hmuh theihin awm se.
17. Containment zone-ah chuan sample collect ngaite zir chian niin, chak lehzuala hmalak ṭhin a ni.