Kangmei tichhuaktu la hre lo

April 24, 2021 aṭanga Saisih ram, Lunglei ram aṭanga kângmei a chhuah chhan chhuitu Lunglei police-te chuan kângmei tichhuaktu tak an la man lo a, an chhui zui mek zel.

Vanglaini palai zawhna chhangin Lunglei SP Rex Zarzoliana chuan, hnu chhui an la chhunzawm zel thu a sawi a, "Kângmei chhuah ṭan tirha a kan ṭanna bâwr vela an hmuh hote thu kan zawtfiah nual tawh a, mahse, rinhlelh man tur erawh an la awm lo. He thubuai hi kan titawp mai dawn lo a, kan la chhui zui zel dawn a ni," a ti.

Tarlan tawh angin, Saisih ram a kan hnuah Lunglei ram hmun hrang hrangah kângmei a chhuak a, kângmei ṭhelh turin Indian Air Force helicopter chah a ni.

Lunglei police-te chuan, kângmei chhuah chhan an chhui nghal a, chak lehzuala chhui a nih theihna atan SDPO kaihhruai Special Investigation Team an din a ni.