KHAWTHLIR

NSS che chhuak
Zirna-in hrang hranga NSS volunteer-te chuan May 24-26, 2021 chhung khan an awmna khaw hrang hrangah thil chi hrang hrang an sem. Lunglei HSS, Republic HSS, Kolasib College, Hindi Training college, Sairang HSS, Zemabawk HSS, Brilliant HSS, Central HSS, Lunglei College, Champhai College, Kawlkulh HSS, Lawngtlai College, Khawhai HSS leh Thingsai HSS volunteer-te'n ṭanpuina sum, buhfai, tél, dailuah, alu, chini leh artuite an sem a ni.

CMRF-ah sum pe
Chief Minister's Relief Fund for Covid-19 ah nimin khan Class-I Contractors Association, Mizoramin Rs. 2,00,000 an chhûng lut. CMRF-a sum lut tawh zawng zawng chu Rs. 23,51,48,954 a ni a, Rs. 22,25,10,970 hman tawh niin, hman loh Rs. 1,26,37,984 a la awm a ni.

SRH-ah mi 21-in Ventilator hmang
State Referral Hospital (ZMC)-ah Covid-19 vei mi 185 an awm mek a, chu'ng zinga mi 31 chu ICU-ah awmin, mi 154 chu ward hrang hrangah an awm. SRH-ZMC Bulletin tarlan danin, ICU-a awm zinga mi 21 chu ventilator hmanga enkawl mek an ni. Mi 185 zingah ni 21 aia rei awm tawh mi 11 leh ni 14 aia rei awm tawh mi 17 an awm.

Deputy CM thilpek
Deputy chief minister Tawnluia'n a bial, Tuichang constituency chhunga village task force hrang hrang te, Khawzawl Hospital, Khawhai leh Sialhawk khuaa damdawi-ina hman tur hmanrua leh damdawi chi hrang hrang a pekte chu nimin khan Khawzawl DC pisa tualah sem a ni. Hmanraw semte chu - hmai tuamna 4,030, kut tihfaina litre 120, PPE 110, infrared thermometer 20, pulse oximeter 20, steamer 30, bleaching powder kg. 100 leh sodium hypochlorite solution 24 a ni.

East-II ah hripui vei an tam ber
Mizorama MLA consituency 40 zingah Aizawl East-II ah Covid-19 positive an tam ber a, nimin tlai thleng khan hripui vei 613 an awm. East-II huam chhunga veng hrang hranga hripui vei zat chu - Chhinga Vengah 222, Saron Vengah 165, Dawrpuiah 85, Tuithiangah 56, Armed Veng South-ah 56 leh Armed Vengah 29 an awm a, Chite Vengah chuan hripui vei an awm lo thung.