CMRF-ah Rs.23,51,48,954 a lut tawh : Hman loh Rs.1,26,37,984 a la awm

Chief Minister’s Relief Fund (CMRF) for Covid-19 ah nimin thleng khan Rs. 23,51,48,954 a lut tawh a, Rs. 22,25,10,970 hman tawh niin, hman loh Rs. 1,26,37,984 a la awm.

CMRF for Covid-19 a sum thawh khawmte chu a hman dan tur ngaihtuahtu Committee on Utilization of CMRF for Covid-19 rêl anga pek ṭhin a ni a, April 9, 2020-ah sem ṭan a ni. Sorkar thuchhuahte aṭanga a lan danin, kum 2020 chhung khan CMRF aṭangin Rs. 20,67,24,500 sem chhuah a ni a, kumin 2021-ah ṭum hnih sem tawh niin, Rs. 1,57,86,470 pek chhuah tawh a ni.

Chief Minister Office (CMO) aṭanga Vanglaini thu dawnna chuan, CMRF for Covid-19 chu langtlang taka hman a nih thu a sawi a, "Sum kan hman dawn apiangin IPR department kaltlangin kan puangzar zel a, a hmanna pawh IPR kaltlang thoin kan puangzar ṭhin," a ti.

CMRF hi Covid-19 task force hrang hrang, tlawmngai pawl, swab sample test-na hmanraw leina, home, centre, covid care centre, community quarantine centre, state páwna tangkhangte hruai hawna leh an ei leh in, Mizoram House-a tangkhangte thlen man, sample endikna, khawpui liana Mizo welfare, ramria duty vanga thite leh mirethei leh harsa chhawmdawlna atan te hman a ni tlangpui.

Kum 2020 chhung khan medical kaihhnawih chi hrang hrangah sum eng emaw zat hman a ni a; New Delhi-a Chin ráltlante puih nan Rs. 5,00,000 hman a ni bawk.

Kum 2021 chhungin CMRF sum pek chhuah a awm nual tawh a; March 30 khan district pakuaa quarantine facility/centre-te enkawl nan Rs. 60,00,000, New Delhi-a Mizoram House Resident Commissioner hnenah Mizo pali China aṭanga hruai hawte chaw ei man atan Rs. 36,470, Covid-19 leh a kaihhnawih thil dang buaipuina senso atan Champhai DC hnenah Rs. 1,00,000 leh Central YMA hnenah Rs. 5,00,000 pek a ni. May 17 khan total lockdown kalpui vanga khawsak harsate puihna atan district 11-ah Rs. 91,50,000 pek chhuah a ni bawk.