Veng pahniha Covid-19 vei zingah Myanmar aṭanga lut 45 vel an awm
Covid-19 hripuiin a luhchilh nat zual zinga mi, Aizawla veng pahnih - Chhinga Veng leh Electric Vengah hripui vei thi mi pathum an awm tawh a, an vai hian tun hnaia Myanmar politics buai vanga raltlana rawn chhuk an ni. Veng pahnihah hian Myanmar aṭanga rawn chhuk, Covid-19 positive mi 45 vel hmuh chhuah a ni tawh.
Aizawla veng mala Covid-19 vei hmuh chhuah tamna ber nia hriat Chhinga Vengah chuan hripui vei zinga mi pahnih, hmeichhia ve ve an thi tawh a, kumina Myanmar aṭanga rawn chhuk ve ve an ni. Pakhat chu Chhinga Vengah vui a ni a, pakhat zawk chu Myanmar lamah phurh chhoh a ni thung.
Chhinga Veng Local Task Force hruaitute hnen aṭanga thu dawn danin, an venga Covid-19 positive hmuh chhuah zinga mi 10 chu Myanmar aṭanga rawn chhuk an ni a; eng emaw zat chu dam takin an chhuak tawh a ni.
Electric Vengah chuan Covid-19 vei zinga pakhat a thi tawh a, Myanmar aṭanga kumina rawn chhuk ni mah se, Electric Vengah vui a ni a, Myanmar-ah lâk a ni lo.
Vanglaini palai zawhna chhangin Electric Veng LTF Chairman chuan, nimin thleng khan an vengah Covid-19 positive mi 264 hmuh chhuah a ni tawh a, mi 152 chu dam takin an chhuak tawh a, enkawl mek mi 111 an awm tih a sawi. Hripui vei hmuh tawh mi 264 zinga mi 35/36 vel chu Myanmar aṭanga rawn chhuk an nih thu a sawi bawk.
Electric Veng LTF Chairman chuan, an venga cheng hripui vei hmuh chhuahte chu contact tracing vanga swab sample endik an nih deuh zel tawh thu sawiin, "Quarantine lai an ni deuh zel a, positive hmuh chhuah tam rih mah se, chî-âina tur a awm lo," a ti.
Nimina Electric Veng LTF thuchhuak chuan, nimina result chhuaka an venga hripui vei hmuh thar zinga mi 29 chu containment zone-a puan mek huam chhunga mi an nih thu a tarlang a, "Positive zingah chhungkua pakhata member 22 awmna a awm a, chuta ṭang chuan mi 14 an positive a, heta chêngte hi kan unau ráltlânte an ni. Anni bakah hian home quarantine lai ni lo positive pakhat chiah kan neih belh a, a dangte hi ṭha taka home quarantine laite an ni," tiin, containment area pawh sáwr zím turin sorkarah rawtna thlen mek a nih thu a tarlang.