Internet ṭha zawk pe turin ngen
MZP chuan, Covid-19 léng leh inkhârkhip mek a nih avanga college zirlaite tana online hmanga exam buatsaih a ni tur chu ṭha a tih thu an tarlang a; hmun kilkhâwr zawka awm zirlaite pawhin internet ṭha zawk an neih theih nan chak zawka hma la turin thuneitute an ngen.
MZP thuchhuah chuan, zirlaite'n online exam ṭha taka an hmachhawn theihna tura Information & Communication Technology (ICT) department-in internet signal chak leh ṭha lehzual an neih theih nana hma an la chu lawmawm an tih thu an sawi a, "Zirlaite'n harsatna tâwk lo leh thingtlang kilkhâwr thlenga internet signal ṭha zawk a awm theih nan chak zâwka hma la turin ICT thuneitute kan ngen a ni," an ti.
Mizoram University-in June 2, 2021 aṭangin college zirlaite exam tura a ruahman leh zirlaite chu khawpuia awm vek tura a tih chungchangah MZP chuan, "Zirlaite exam dan turah hian felfai taka ruahmanna siam turin thuneitute kan ngen a ni," an ti a; zirlai tam tak chu mahni khaw lamah an awm mek thu te, chhungte Covid-19 positive an nih avanga in lama inkhung mekte an awm thu te, internet signal ṭhat lohna a tam thute an tarlang.