Vaccine dose 3,02,284 pek a ni tawh

Integrated Disease Surveillance Programme (IDSP) tarlan danin, January 16, 2021 aṭanga nimin thleng khan Mizoramah Covid-19 laka invênna damdawi, Covishield mi 2,50,244 hnenah dose 3,02,284 pek a ni tawh.

Covid vaccine hi nimin bikah chuan mi 657 hnenah pek a ni a, first dose 656 leh second dose pakhat pek a ni.

Kumin January 16 aṭanga nimin thlenga Covid vaccine pek zingah hian kum 45-60 inkar mi 1,33,122 hnenah first dose leh mi 4,637 hnenah second dose, an vaiin mi 1,70,759 hnenah pek a ni tawh a, vaccine dawngtu hlawm ṭhen zingah a tam ber an ni mek.

Vaccine pek tawh hlâwm ṭhen (category) hrang hrang zingah healthcare worker zingah vaccine dose dawng kim tawh an tam ber a, mi 15,374-in dose khatna dawng tawhin, mi 11,398-in dose hnihna an dawng tawh.

May 17 aṭangin kum 18-44 inkar hnenah vaccine pek ṭan a ni a; mi 12,078 hnenah vaccine pek tawh niin, second dose pek a la hun lo vek a ni. Kum 18-44 inkarte hnenah hian nimin khan mi 259 hnenah vaccine pek a ni.

Covid vaccine hi dose pek tawh zawng zawng chu 3,02,284 a ni a, first dose 2,50,244 leh second dose 52,040 pek tawh a ni.