Pathianin a hun takah Zoramthanga a húng chhuak ṭhin - TJ Lalnuntluanga

Minister of state TJ Lalnuntluanga chuan nimin khan Lawngtlai district leh Hnahthial district khaw ṭhenkhat a tlawh a; amah dawngsawngtute hmaah thu sawiin, chief minister Zoramthanga leh a thawhpuite chu Pathian­in a hun takah a húng chhuak ṭhin niin a sawi.

TJ Lalnuntluanga hian Siachangkawn, South Lungpher, Sangau leh South Vanlaiphai leh Hnahthialte a tlawh a; thu sawiin, "MNF chu 'Pathian leh kan ram tan' titu kan ni a, Pathian zarah sorkarna chang chhoin, sorkar a chak chho ṭan hle. Covid-19 laka kan him theihna chhan hi Chief Minister-in Pathian a ṭih vang a niin ka hria. A hun takah Pu Zoramthanga leh a thawhpuite hi Pathianin a húng chhuak ṭhin," a ti.

Kum 2007-a mautàm laiin Pathianin Zoram­thanga a CM tir a, a thlàwnin buhfai sem a nih thu sawiin, "Kan CM Pu Zoramthanga hi a ṭawngṭai tam a, Pathian ráwnin mipui ngaihdan a la thiam ṭhin hle. Kohhran leh tlawmngai pawlte chena thawhpuia a sàwm thiam vang pawh a ni. Task force leh kohhran chung­ah pawh lawmthu ka sawi tak meuh a ni," a ti a; 'Kan rah chin a­piang kan ram' ti thei tura theihtawpin hmalak zel a ngaih thu a sawi.

TJ Lalnuntluanga chuan, Covid-19 donaah Mizoram anga admi­nistration felfai nei an awm lo nia a sawi rual­in, "Sorkar hmalakna sawiseltu pawh an awm reng ang, chu'ngte chu ngaihdama hawisan mai mai tur. Tunah hian mi­nister leh MLA zawng zawng hi nuamtàwla zin kual kan ni ve lo a, ram himna tura hrehawm tam tak tuara ramria duty-te a hmunah hmuhpui leh hriatpui tura zin kan ni," a ti.