KHAWTHLIR

Containment area
Lunglei DC Kulothungan A chuan, Lunglei Electric Vengah tun hnaia Covid-19 vei an tam avangin, hmun ṭhenkhat, chhungkaw 23 luah lai in pathum leh chumi chhehvel hmunte chu luh leh chhuah phal lohna hmun, containment area-ah nimin khan a puang.

Aizawla 46 AR awm hun a tawp
Governor PS Sreedharan Pillai chuan nimin khan Raj Bhavan-ah 46 Assam Rifles-te hnenah chawimawina thuziak a hlan. 46 AR-te hi April 17, 2017-ah Aizawlah an awm ṭan a, kum li vel an awm hnuah nimin May 28 khan an awm hun a tàwp a, batallion dang an awm zui ang.

CM Relief Fund pe
Chief Minister's Relief Fund for Covid-19 ah nimin khan mimal leh pawl pahnih ve vete'n Rs. 95,000 an chhûng lut. Nimin thlenga CMRF for Covid-19 sum lut tawh chu Rs. 23,56,23,954 a ni a, Rs. 22,25,10,970 hman tawh niin, la hman loh Rs. 1,31,12,984 a awm.

ICU-ah mi 35 awm
State Referral Hospital-ah nimin tlai dar 5 thleng khan Covid-19 vei mi 198 an awm a, ICU-ah mi 35 leh ward-ah mi 163 enkawl an ni. SRH-ZMC Bulletin tarlan danin, ICU-a enkawl mek mi 35 zinga 22 chu ventilator hmantir mek an ni a, ward-a awm zinga mi 39 chu oxygen pek mek an ni bawk. SRH-ah hian nimin khan hripui vei mi 21 dah luh an ni a, mi 12 chhuahtir (discharge) niin, mi pahnih chu CCC-ah sawn an ni.

CCCC din sawiho
Champhaia community covid care centre (CCCC) din dan tur leh Myanmar aṭanga ráltlânte chungchangah nimin khan district bawrhsap Maria CT Zuali hoin sorkar, kohhran leh khawtlang hruaitute an ṭhukhawm. Covid-19 laka him nan leh ramri kaltlanga dan loa thil tih awm thei vên nan DC, SP leh YMA hotute'n ruahmanna siam se, an ti a, CCCC din chu kohhran committee-in a ṭul anga bawhzuia ngaihtuahho phawt ni se an ti.

Mamit Hospital thlang
Mamit District Hospital-a nau neihna chu India rama nau neihna (labour room) ṭha berah thlan a ni a, 'LaQshya Certificate' pek a nih thu, nimin khan National Health Mission (NHM) mission director Dr Eric Zomawia'n a puang. Nau neihna pindan ṭha thlanna hi NHM hnuaia State Quality Assurance Programme bultuma neih a ni.