SA hotu Com. Lalzamlova a thi

Salvation Army (India Eastern Territory) hotu ber, territorial commander Com. Lalzamlova (59) h/o Com. Nui chu nimin zing dar 8:25 khan lungphu châwl (heart attack) vangin Ebenezer Hospital, Aizawlah a thi a, nimin tlai dar 3 khan Aizawl Temple Corps Biak inah vui a ni.

May 20, 1962-a Kawn­pui, Churachand­pur-a piang Com. Lal­zamlova hian kum 1984 khan Officers' Training College-ah Pathian thu a zir a, kum 1986-ah Salvation Army puithiam (officer) atan dah ngheh (commission) a ni. Hmun hrang hranga a awm kual hnuah July 2017 aṭangin SA India Eastern Territory-ah territorial commander a ni ṭan.

Com. Lalzamlova hi May 26, 2021 khan YP Corps Sunday puala sermon-a record zo chu a pum a nat thut avangin Aizawl Civil Hospital panpui a ni a, chumi hnu­ah Ebenzer Hospital panpui leh a ni. Nimin zing khan a thâwk a buai thut a, zing dar 8:25-ah a thi a ni. A nupui leh a fate pathum a kalsan.