Covid vanga sum harsat chhan CM Zoramthanga'n a sawifiah

Chief minister Zoramthanga chuan Covid-19 léng mek chungchangah nimin khan thuchah a tichhuak a, Covid-19 vanga Mizoramin sum leh paia harsatna a tawh dan a sawifiah. Hripui laka himna atan ṭawngṭai turin mipui a sáwm bawk.

Chief Minister chuan, sorkarin suma harsatna a tawhte mipuiin an hriat ve ṭha a tih thu sawiin, "Budget hi nikum leh kum hmasa lama mi en chungin 'Kumin chu heti zat hi kan hmu thei ang chu maw' kan tih, rin thu a ni. Kan han pharh a, 'Heti zat hi hman theih turin pass phawt ang' tiin kan pass a ni a, a pangngaiah chuan a sual tam ngai lo ṭhin," a ti.

Covid-19 leng avangin India ram leh Mizoram a buai ta vek nia sawiin Zoramthanga chuan, "India rama tax lâk khawm, sum lak luh percentage a hniam a, chumi percentage ang zel chu state-ah sem ṭhin a nih avangin pawisa dawn tur a tlem phah ta a ni," a ti a; chhiah lut hniam chu sorkar laipui leh state sorkar thiam loh a nih loh thu a sawi.

Hripui avangin sum hmuh a tlahniam vek tih sawiin CM Zorama chuan, "Kum 2020-21 budget-a kan hmuh tura kan ngaih, kan pass hnanah khan sorkar laipuiin a tum ang sum an lak khawm theih loh avangin kan hmuh tura kan dah aṭangin cheng vbc. 1,500 vel kan hmuh tâk loh phah a ni," a ti.

Zoramthanga chuan, kumin financial year (2021-22) leh World Bank hun tàwp a innan thu sawiin, "Khata kan state-in kan tum lêt vena, kan pek ngei ngei tur kha vbc. 70 a hlâwmpuia pek chhuah a ngai. Hei bakah hian, kum 10 kal taa Mizoramin leiba tlingkhawm a neih vbc. 150 kan pek ngai a awm bawk," a ti a; kuminah rin loha pek tâk leh nikuma hmuh tura rin, hmuh tâk loh a tam thu a sawi.

Chief Minister chuan, Covid-19 dona atan a ṭul apiangah sum hman a nih thu sawiin, "Loh theih loha in sak ngai te, kháwl lei ngai te, ei man pek ngai te, inthiar kualna leh a dang chi hrang hrang tan vaibelchhe tél tam kan hmang a ni. Ni tin hian kan pawisa neihte uluk taka chîkin, a mawngnáwi kan hâi a ni. Hri léng avanga harsatna chu khawvel pumin a tâwk," a ti.

Hmasawnna hna thawhna tur sum chu tihngaihna a awm lo tih sawiin CM Zorama chuan, "Amaherawhchu, central aṭangin tawp ringawt loin kawng laihna, in sakna, mipui inhlawhfâkna tur rawn pek an nei. Chu'ng sum an rawn pek chu an pek chhanah chiah bak chuan thil dangah a hman theih loh," a ti a, state sum aṭangin hmasawnna hna thawh theih a nih loh thu a sawi.

Chief Minister chuan, Pathian ṭanpuina lo chuan Covid-19 chu do theih a ni lo tih sawiin, "Pathian hnenah hripui laka kan himna tur hmanrua kan neih theih nan i dil ang u. Lei leh vana thuneitu hnenah kan dil ang a, tâwk a tih hunah hnehna min la puansak ang tih ring chungin theihtawpin mimal, kohhran leh ram pumin i ṭawngṭai ang u tih ka chah che u a ni," a ti.