Internet service buaipui tur din

Mizoram sorkar chuan hripui leng avanga zirlaite leh zirtirtute, sorkar office leh sumdawnna hrang hrangin mobile leh internet lama harsatna an neihte sukiang turin Covid Task Force on Mobile and Internet Services a din.

Information & Com­munication Technology (ICT) minister Robert Romawia Royte hmalakna kal zelah Covid Task Force on Mobile and Internet Ser­vices din a ni a, ICT sec­retary Lalramsanga Sailo chu chairman a ni ang. Member-te chu ICT chief informatics officer Dr Lalthlamuana, NELSA director C Lalhmachhuana te bakah, NIC-Mizorama State Informatics Officer, Power Grid Corporation of India leh service provider aiawhte an ni.

Covid Task Force on Mobile and Internet Services hian service provider-te hmalak dan an thlir ṭhin dawn a; service petute harsatna enpuiin a chinfelpui ṭhin ang.

ICT department tarlan danin, mobile leh internet signal-te a ṭhat reng theih nan mobile tower-in power an hmuh reng a ngai a, electric power ṭhat lohna laiah diesel generator hmangin power pek a ni ṭhin.

Hmun thenkhatah diesel thuntu leh mobile tower siamtute tan harsatna siam ṭhin a nih avangin tower-te an enkawl ṭhat theih loh thu sawi a awm ṭhin a; ICT department chuan mobile signal-te a ṭhat zawkna turin tower buaipuitute chu him leh ṭha taka lo buaipui turin Mizorama local/ village task force-te an ngen a ni.