Lunglei Sub-Hqrs YMA-in Lungleiah RTPCR bun vat turin minister an ngen

YMA Sub-Headquarters, Lunglei chuan nimin khan Health & Family Welfare (HFW) Minister hnenah lehkha thawnin, MLA Zodintluanga Ralte-in Civil Hospi­tal, Lunglei tana RT-PCR khawl a pek tawh chu hman theiha bun (install) thuai turin an ngen.

Lunglei Sub-Hqrs YMA chuan an lehkhaah, MLA Zodintluanga'n Lunglei Civil Hospital-a dah tur RT-PCR kháwl a pek chu Covid-19 vei hmuh chhuah kawngah nasa taka thawktute puitu tur nia an hriat avangin an lawm thu an tarlang.

Sub-Hqrs YMA chuan, Health Minister remruatna leh ṭhahnem­ngaihna avanga study team Lungleia kalte'n khawl bun theih dan an en chu lawmawm an tih thu sawiin, "HME Director-in Medical Superintendent, Lunglei hnena a hma thei ang bera RTPCR khawl bun tura a rawn tihna kan lo hriat phei kha chuan kan lawm tak zet a ni. Nghâkhlel taka kan thlir lai hian, tun thlengin bun a la ni thei lo chu pawi kan ti hle mai a, mipui hian kan tuar tlatin kan inhria a ni," an ti.

Lunglei Sub-Hqrs YMA chuan, "RT-PCR kháwl hi a hma thei ang bera bun (install) tura hma min laksak turin kan han ngen che a. Khawl bun nana Civil Hospital, Lunglei hian duhthusam a zo lo a nih pawhin, mipui manganna leh mamawhna avang hian i ngaihhnathiamna nen hma min laksak theih beiseina kan nei tlat a ni," an ti a; ngenna an siam chu Executive Committee thutlukna anga an tih thu an tarlang.

YMA ngenna chu mipuiin beiseina sang tak nen an thlirpui tih sawiin Lunglei YMA chuan, "Lungleia RT-PCR khawl hman theiha a awm chuan chhim lam zawng zawng tan a ṭangkai em em dawn a ni tih kan hriat avang hian kan nghahhlelh zual phah a ni. Inthlahrung tak chungin i hnenah khawngaih kan rawn dil che a, a remchan ang anga hmanhmawh taka hma min laksak theih chuan kan lawm hle ang," an ti bawk.

Health Minister hnenah ngenna an thlen chungchangah hian Lunglei Sub-Hqrs YMA secretary Zothanzuala chuan, RT-PCR khawl awm tawh chu a hma thei ang berin sorkarin hman theihin bun se an duh thu a sawi rualin, hun bituk erawh neih chi nia an ngaih loh thu a sawi.

Zothanzuala chuan, tunah hian Lungleiah Covid-19 vei an pung tih sawiin, "Electric Vengah phei chuan positive mi 60 chuang an awm tawh a, tunah hian Lungleiah Truenat test kit an nei lo niin an sawi a, test-na hmanrua kan mamawh em em a ni," a ti a; an lehkha chu a copy Lunglei district chhunga MLA zawng zawng, HME Director, Lunglei DC leh Medical Superintendent-te an pek tel thu a sawi bawk.