Dawr hawn ni-ah veivâk an tam

May thlaa total lockdown chawlhkar thumna kal mekah nimin kha dawr hawn ní a ni a, Aizawlah lirthei veivâk a tam a, police leh traffic police duty-te'n lirthei veivâk zinga phalna nei lo eng emaw zat an man. Mi an mante chu driving license leh task force phalna lehkha nei lo an ni.

Vanglaini palaiin Aizawl hmun hrang hranga duty-te a kawmnaah, lirthei veivâk a tam thu an sawi a, "Task force lehkha neia chhuak an ni tlangpui a, nei lo pawh an awm nual," an ti.

Dawr hawn ní ni loah chuan lirthei tlân chhuak zingah phalna nei lo an tlem ṭhin thu an sawi rualin, "Detailment order lem leh phalna nei lo identity card hmang man tur an awm leh zeuh ṭhin," an ti bawk.

Sorkarin total lockdown inkaih-hruaina a siam angin nimin kha eichawp dawr, stationery leh chawhmeh dawr hawn ní a ni. Aizawlah chuan total lockdown chawlhkar thumnnaah hian a kár khatna leh kár hnihna aiin mamawh lama chhuak an tam zawk niin a lang a, a bikin zirlaibu leh sikul uniform zawrhna dawrte a lûn hle a ni.