Dr Lal Path Labs-in PPE 3,000 an pe
Dr Lal Path Labs chuan Mizoram sorkarah personal protective equipment (PPE) set 3,000 a pe a, nimin khan laboratory administrator Nathan T Lalchhanchhuaha leh territorial manager C Lalramlianmawia ten Health minister Dr R Lalthangliana hnenah an hlan.
Dr Lal Path Labs-in PPE an pek hi set khat Rs. 950 man a ni a, set 3,000 sorkara an hlan chu Rs. 28,50,000 man a ni.
Health Minister chuan, Covid-19 donaah sample test kit leh PPE-te chu mamawh zual bik a nih thu sawiin, "PPE kit phei chu ZMC-ah ringawt pawh ni tin 200 chuang kan hmang a, frontline worker, sample la tu, laboratory leh positive enkawlna hmuna thawkte leh mi dangin an hman nen chhût chuan, ni tin 500 vel hmang ang kan ni," a ti a; ram hrang hrangah PPE mamawhna a sàn avangin lei tur hmuh a har thu leh Dr Lal Path Labs-in 3,000 an pe chu a lawmawm a tih thu a sawi.
Swab sample endik tur a tam avangin tun hnaiah test kit a hek tih sawiin R Lalthangliana chuan, "TrueNAT laboratory-a kan hman tur pawh a kháwl siamtu Molbio Diagnostics, Goa siam lo chu hman theih a ni lo a, cheng nuai 100 chuang man kan order tawh sa pawh ram pumah thlawhtheihna a mumal loh avangin niminah a rawn thleng thei chauh a, vawiinah district hrang hrang mamawh turte kan sem chhuak nghal a ni," a ti.
Dr R Lalthangliana chuan, ventilator ṭha chi 35 lei tur an order zinga 25-in Kolkata a thlen tawh thu te, a siamtu company engineer-te'n an remkhawm mek thu te, June 1, 2021-ah Mizoram a thlen an beisei thu te, ventilator pakhat chu Rs. 13,00,000 vel man a nih thute a sawi bawk.
Health Minister tarlan danin, nimin khan Singapore aṭangin oxygen cylinder type-B (litre 10) 50 chu Mizoramah phurh thlen a ni a; Kuwait aṭanga Mizoramin a dawn oxygen jumbo cylinder (litre 40) thun khah sa 180 pawh Guwahati aṭangin motor-in Mizoram panpui mek a ni.